काठमाडौं असोज २६ गते ।
आईसीसी एकदिवसीय विश्वकपमा अस्ट्रेलियाले लगातार दोस्रो हार बेहोरेको छ । अस्ट्रेलियाले बिहीबार भएको खेलमा दक्षिण अफ्रिकासँग १३४ रनको फराकिलो हार बेहोरेको हो ।
भारतको लखनउस्थित एकाना क्रिकेट रंगशालामा सम्पन्न खेलमा दक्षिण अफ्रिकाले प्रस्तुत गरेको ३१२ रनको लक्ष्य पछ्याउने क्रममा ४०।५ ओभरमा १७७ रनमै समेटियो । अस्ट्रेलियाका मार्नुस लाबुसचेन्जले ४६ रन बनाए । मिचेल स्टार्कले २७, कप्तान प्याट कुमिन्सले २२, स्टिभ स्मिथले १९, डेविड वार्नरले १३ र एडम जाम्पाले ११ रन जोडे ।अस्ट्रेलियालाई सस्तैमा समेट्न दक्षिण अफ्रिकाका कगिसो रबाडाले तीन विकेट लिए ।
मार्को जान्सेन, केशव महारेज र तबरेज साम्सीले समान दुई विकेट लिए । लुङ्गी एनगिडीले एक विकेट हात पारे । त्यसअघि टस हारेर ब्याटिङमा आएको दक्षिण अफ्रिकाले निर्धारित ५० ओभरमा सात विकेट गुमाएर ३११ रनको योगफल खडा गरेको थियो । दक्षिण अफ्रिकाका क्विन्टन डी ककले १०९ रन बनाए । उनले १०६ बलमा आठ चौका र पाँच छक्का प्रहार गरे ।
आइदेन मार्करमले ५६ रन थपे । कप्तान टेम्बा बवुमाले ३५ र हेनरिक क्लासेनले २९ रन जोडे । यस्तै, रसे भान डेर डुसेनले २६ र मार्को जान्सेनले समान २६ रन बनाए । अस्ट्रेलियाका मिचेल स्टार्क र ग्लेन म्याक्सवेलले समान दुई विकेट लिए । जस हेजलउड, एडम जाम्पा र प्याट कुमिन्सले एक–एक विकेट लिए । जितसँगै दुई खेलबाट चार अंक जोडेको दक्षिण अफ्रिका तालिकाको शीर्ष स्थानमा उक्लिएको छ । समान खेल खेल्दा पनि अंकविहीन अस्ट्रेलिया नवौँ स्थानमा छ ।
Discussion about this post