बाँके कात्तिक २६ गते ।
कात्तिक २० गते मध्य रातमा वडा प्रहरी कार्यालय नेपालगन्जले नेपालगन्ज उपमहानगरपालिका १० भृकुटीनगरबाट ९ जना जुवाडे पक्राउ पर्यो । मोटो रकम लेनदेन भइरहेको उक्त जुवा खालबाट प्रहरीले नगद रुपैयाँ र जुवामा प्रयोग गरिने सामग्री समेत बरामद गरेको थियो । यसले चाडपर्वको अवसरमा बाँकेको नेपालगन्ज, कोहलपुर, राँझा लगायतका ठुला साना सहरमा जुवातास भइरहेको छ भन्ने प्रमाणित गर्छ ।
जुवातास खेल्ने क्रम जारी रहे पनि बाँके प्रहरीले त्यसपछि जुवाडे पक्राउ गर्न सकेको छैन । सुराकी नभएका कारण बाँके प्रहरीले जुवाडे पक्राउ गर्न नसकेको सर्वसाधारण बताउँछन् । ‘नेपालगन्जमा रातमामात्र नभई दिउँसोमा समेत जुवातास खेल भइरहेको छ, तर प्रहरीले कसैलाई समात्न सक्दैन,’ नेपालगन्जका एक सर्वसाधारणले भने, ‘जुवातासमा प्रहरीले सेटिङ मिलाएको आशंका छ । नत्र अघिल्ला वर्षमा समातिने जुवाडे यस वर्ष किन समातिन्नन् ।’
नेपालगन्ज, कोहलपुर, राँझा मात्र नभई नेपाल–भारत सीमा नजिक रहेको साईगाउँमा समेत दैनिक लाखौँ रुपैयाँको जुवातास हुने गरेको छ । त्यहाँ नेपालगन्जका ब्यापारीहरु समेत जुवा खेल्न पुग्ने गरेको स्थानीय बताउँछन् । उक्त ठाउँ नेपालगन्जबाट टाढा र भारतसँग सीमा जोडिएको छ । ‘साईगाउँमा प्रहरी, प्रशासनको आँखा पुग्न सक्दैन । प्रहरी आइहाले भारततर्फ भाग्न सजिलो छ । त्यसैले जुवाडेहरु साईगाउँलाई जुवा खेल्ने उत्तम थलोको रुपमा लिएको पाइन्छ,’ एक स्थानीयले नाम नबताउने सर्तमा भने ।
साई गाउँमा नयाँ नयाँ जुवाडे पुग्ने गरेको स्थानीयको भनाई छ । स्थानीयका अनुसार कहिलै नदेखेका जुवाडे त्यहाँ पुग्ने गरेका छन् । यस वर्ष बाँके प्रहरीले जुवातास नियन्त्रण गर्न तर्फ चासो नदिएको सर्वसाधारणको भनाई छ । यस वर्ष प्रहरीले किन चासो देखाएन कुन्नी ?,’ एक जनाले प्रश्न गरे ।
Discussion about this post