बाँके पुस १० गते ।
कोहलपुरमा आजदेखि सुरु हुने सातौं अन्तर मावि मेयर कप तथा १६ औं पालिका स्तरीय राष्ट्रपति रनिङशिल्ड खेलकुद छनौट प्रतियोगिता सुरु भएको छ । कोहलपुर नगरपालिकाको आयोजना तथा कोहलपुर नगर खेलकुद विकास समितिको संचालन र व्यवस्थापनमा आयोजित उक्त प्रतियोगिताका खेलकुदहरु विहानदेखि सुरु भएका छन् ।
‘स्वास्थ्यका लागि खेलकुद, राष्ट्रका लागि खेलकुद’ भन्ने मुख्य नाराका साथ सुरु भएको प्रतियोगिताको औपचारिक उद्घाटन भने दिउँसो नगर प्रमुख पूर्ण प्रसाद आचार्यले कोहलपुर नगरपालिका–२ स्थित तेह्र विघा खेल मैदानमा उद्घाटन गर्नेछन् । तर खेलकुद गतिविधिहरु भने विहान सात बजेदेखि नै सुरु भएको प्रतियोगिता आयोजक समितिका सदस्य सचिव वीरेन्द्र मल्लले जानकारी दिए ।
अन्तर मावि मेयर कपलाई पनि पालिकाले प्राथमिकता दिएको छ । उक्त प्रतियोगितामा कोहलपुर नगरक्षेत्रका (सामुदायिक र निजी) ३६ माध्मामिक विद्यालयका १ हजार ३ सय ६७ जना खेलाडी (छात्रछात्रा)हरुले भाग लिँदैछन् । जसमा छात्र ७ सय ९६ जना र छात्रा ५ सय ७१ जना रहेको मल्लले जानकारी दिए ।
प्रतियोगितामा एथ्लेटिक्स, भलिवल, कपडी र मार्सलआर्ट (तेक्वन्दो, उस्सु र कराँते) का चार इभेन्ट समावेश गरिएको छ । यो वर्षदेखि मार्सलआर्ट विधा थप भएको छ । प्रतियोगितामा ५० गोल्ड मेडलका लागि प्रतिस्पर्धा हुनेछ ।
अघिल्ला वर्षहरुमा विद्यालयहरुले अन्तर मावि मेयर कप तथा पालिका स्तरीय राष्ट्रपति रनिङशिल्ड छनौट प्रतियोगिताहरुको व्यवस्थापन गर्दै आएकोमा यो वर्षदेखि कोहलपुर नगर खेलकुद विकास समितिको व्यवस्थापनमा हुन लागेको नगर खेलकुद विकास समितिका अध्यक्ष बुद्धिबहादुर थापाले जानकारी दिए ।
Discussion about this post