बाँके बैशाख ९ गते ।
भारतबाट भन्सार छलेर विभिन्न सामान नेपालतर्फ अवैध रुपमा आयात भइरहेका बेला नेपालबाट पनि अबैध रुपमा भारततर्फ नेपाली उत्पादन लैजाँदै गरेको भेटिएको छ । ठुलो परिमाणको खुकुरी चुरोट प्रहरीले नेपालगञ्ज जमुनाहनाका स्थित बरामद गरेको छ ।
जिल्ला प्रहरी कार्यालय बाँकेका प्रहरी प्रवक्ता डिएसपी नारायण डाँगीका अनुसार नेपालगन्ज उपमहानगरपालिका–१५ जमुनाहबाट अवैध रुपमा भारततर्फ चोरी निकासी गर्न लागिएको एक हजार ४५२ प्याकेट खुकुरी चुरोट प्रहरीले बरामद गरेको हो ।
उक्त चुरोटको अन्दाजी मुल्य एक लाख ५६ हजार ४८ रुपियाँ रहेको डिएसपी डाँगीले जानकारी दिए ।
नेपालबाट भारततर्फ लैजाँदै गरेको अवस्थामा इलाका प्रहरी कार्यालय जमुनाहबाट खटिएको प्रहरी टोलीले फेला पारी ढुवानीमा संलग्न दुईजनालाई नियन्त्रणमा लिएको डिएसपी डाँगीले बताए ।
बरामद गरिएको चुरोट र नियन्त्रणमा लिइएका व्यक्तिलाई आवश्यक कारबाहीका लागि नेपालगन्ज भन्सार कार्यालयमा बुझाइएको बाँके प्रहरीले जनाएको छ।
Discussion about this post