बाँके जेठ १९ गते ।
नेपालगन्जमा उखरमाउलो गर्मी छ । पानी नपरेका कारण गर्मी बढ्ने क्रम रोकिएको छैन । दिउँसो घर बाहिर हिड्डुल गर्न सक्ने करै भएन विहानसमेत घामले पोल्छ । गर्मीले सर्वसाधारण नागरिकलाई हैरान पारेको छ । बालबालिका, बृद्धबृद्धा बढि प्रभावित भए पनि यूवा र किशोरसमेत आक्रान्त भएका छन् ।
दिउँसोमा नेपालगन्ज बजार प्रायः सुनसान हुन्छ । यातायातका साधन फाटफुट संचालनमा आए पनि अटो रिक्सामा समेत मानिस बसेको देखिदैन । गर्मीले सर्वसाधारण आक्रान्त भइरहेका बेला विद्युत अनियमित हुँदा सर्वसाधारण झनै समस्यामा परेका छन् ।
गर्मीले आहत भएका बेला लो–भोल्टेज र विद्युत अनियमित हुँदा बाँकेबासी थप पीडित भएका छन् ।
गर्मीका कारण घरमा बस्न समेत समस्या भइरहेका बेला विद्युत अनियमितता हुँदा दिनमा घर भित्र बस्न र रातमा सुत्न समस्या भएको नेपालगन्ज उपमहानगरपालिका ५ फुल्टेक्राका मेराज अन्सारीले बताए ।
उनले गर्मीका कारण बाहिर निस्कन सक्ने अवस्था नरहेको बताए । विद्युत अनियमित हुँदा इन्भर्टरले समेत काम गर्न छाडेको उनको भनाई छ । ‘भोल्टेज कम हुँदा पंखा घुम्दैन । विद्युत अनियमित हुँदा इन्भर्टरको ब्याट्री चार्ज समेत हुन सक्दैन,’ उनले भने, ‘झ्यापझ्याप विद्युत जाँदा सास्ती खेप्न परेको छ ।’
विद्युत अनियमितले हैरान बनाएको नेपालगन्ज उपमहानगरपालिका ६ का विकास यादवले बताए । उनले विद्युत अनियमित हुँदा घरमा बस्न सक्ने अवस्था नरहेको स्पष्ट पारे । ‘घर भित्र बसौँ विद्युत नभएर शरिर पसिनाले भिज्छ । घर बाहिर जाउँ घामले पोल्छ,’ उनले भने, ‘विद्युत नियमित भएको भए आरामसँग सुत्न र बस्न त पाइन्थ्यो ।’
विद्युत अनियमितताको बारेमा सोधपुछ गर्दा नेपाल विद्युत प्राधिकरण वितरण केन्द्र नेपालगन्जका कर्मचारी रिसाउने, गालीगलौच गरेको सर्वसाधारण बताउँछन् । ट्रान्सफर्मर जलेको वा कुनै समस्या आउँदा मर्मतका लागि बोलाउँदा समेत विद्युतका कर्मचारीले अपशब्द प्रयोग गरेको नेपालगन्ज उपमहानगरपालिका ५ का एक स्थानीयले गुनासो गरे । उनले भने, ‘मर्मतका लागि बोलाउँदा समेत विद्युतका कर्मचारीले गालीगलौच गर्ने र अपशब्द प्रयोग गरि थर्काउँछन्,’ नाम नबताउने शर्तमा एक सर्वसाधारणले भने ।
विद्युत प्राधिकरणले गर्मीका बेला विद्युत काटेर अपराध गरेको नेपालगन्ज उपमहानगरपालिका ९ बाँके गाउँका रमेश भुजुवाले बताए । उनले शरिर पाक्ने घाममा विद्युतले लाइन काटेर अपराध गर्दै आएको बताए । ‘विद्युतले सर्वसाधारणको ज्यु, ज्यानमाथि खेलवाड गरिरहेको छ । विजुली विना एकछिन बस्न नसक्ने गर्मीमा पटक पटक विद्युत लाइन काटेर अपराध गरिरहेको छ,’ उनले भने ।
Discussion about this post