बाँके, कात्तिक १५ गते ।
नेपालगन्ज भन्सार कार्यालयले चालु आर्थिक वर्ष २०८३/८४ को पहिलो तीन महिनामा पाँच अर्ब २४ करोड ८९ लाख ८५ हजार रुपैयाँ राजस्व सङ्कलन गरेको छ।
साउनदेखि असोजसम्म सङ्कलन भएको उक्त राजस्व वार्षिक लक्ष्यको २०.४ प्रतिशत हो। नेपालगन्ज भन्सार कार्यालयका सूचना अधिकारी पवित्रकुमार खड्काका अनुसार तीन महिनामा लक्ष्यअनुसार राजस्व सङ्कलन हुन सकेको छैन।
कार्यालयले साउनमा एक अर्ब ८३ करोड ४३ लाख ६८ हजार रुपैयाँ राजस्व सङ्कलन गर्ने लक्ष्य राखेकोमा एक अर्ब ६१ करोड १७ लाख ७३ हजार रुपैयाँ उठाएको थियो। त्यस्तै, भदौमा दुई अर्ब नौ करोड ६४ लाख २० हजार लक्ष्य रहेकामा एक अर्ब ७४ करोड १२ लाख ५१ हजार र असोजमा दुई अर्ब ३५ करोड ८४ लाख ७४ हजार लक्ष्य रहेकामा एक अर्ब ८९ करोड चार लाख सात हजार रुपैयाँ सङ्कलन भएको खड्काले बताए।
मासिक लक्ष्यको तुलनामा साउनमा ८७.८७ प्रतिशत, भदौमा ८३.०६ प्रतिशत र असोजमा ८०.३१ प्रतिशत राजस्व सङ्कलन भएको छ। तीन महिनाको तथ्यांकले मासिक लक्ष्यको तुलनामा राजस्व सङ्कलन दर क्रमशः घट्दै गएको देखाउँछ।
गत आर्थिक वर्ष २०८२/८३ मा लक्ष्यअनुसार राजस्व सङ्कलन गर्न नसकेको भन्सार कार्यालयलाई चालु आर्थिक वर्षमा भने थप चुनौती देखिएको छ। गत आवमा २४ अर्ब ५४ करोड ५७ लाख ८२ हजार रुपैयाँ राजस्व सङ्कलन गर्ने लक्ष्य रहेकामा २० अर्ब ११ करोड ५५ लाख एक हजार रुपैयाँ मात्रै सङ्कलन भएको थियो। यो लक्ष्यको ८१.८७ प्रतिशत हो।
गत आवमा वास्तविक रूपमा सङ्कलन भएको राजस्वभन्दा चालु आवको लक्ष्य ६ अर्बभन्दा बढीले वृद्धि गरिएको छ। चालु आवका लागि कार्यालयलाई २६ अर्ब २० करोड ५२ लाख ६५ हजार रुपैयाँ राजस्व सङ्कलन गर्ने लक्ष्य दिइएको छ। यो गत आवको लक्ष्यभन्दा एक अर्ब ६५ करोड रुपैयाँ बढी हो।
नेपालगन्ज भन्सार हुँदै इन्धन, ट्र्याक्टर तथा ट्रेलर, पोलिथिन दाना, चामल, खाद्यान्न र फलामलगायतका वस्तु आयात हुने गरेका छन्। जडीबुटीलगायतका वस्तु भने यहाँबाट निकासी हुने गरेका छन्।
वार्षिक राजस्व लक्ष्य पूरा गर्न आवश्यक कार्ययोजना तयार गरिएको सूचना अधिकारी खड्काले बताए।
Discussion about this post