बाँके असार १० गते ।
राप्तीसोनारी गाउँपालिकाले आज आगामी आर्थिक वर्षको नीति तथा कार्यक्रम र बजेट ल्याउँदैछ । आगामी आर्थिक वर्ष २०८१÷८२ को लागि नीति तथा कार्यक्रम र बजेट सार्वजनिक गर्न लागिएको पालिकाका अध्यक्ष तप्त बहादुर पौडेलले जानकारी दिए । उनका अनुसार गाउँसभाको सम्पूर्ण तयारी पूरा भइसकेको छ ।
विहान ११ बजे गाउँपालिका कार्यालय भवन रहेको अगैयामा आयोजित गाउँसभामा नीति तथा कार्यक्रम र बजेट सार्वजनिक गरिने प्रमुख प्रशासकीय अधिकृत दानबहादुर एडीले जानकारी दिए । उनका अनुसार गतवर्षको हाराहारीमा बजेट सिलिङ तयार पारिएको छ । संघीय बजेटमा भइरहेको उढोत्तरीका कारण त्यसको प्रभाव स्थानीय सरकारको बजेट निर्माणमा पनि परेको उनको भनाइ छ ।
गाउँपालिकाका अध्यक्ष पौडेलले कृषि, सिंचाई, पूर्वाधार निर्माणलाई विशेष प्राथमिकताका साथ नीति तथा कार्यक्रम र बजेट निर्माण गरिएको बताए । ‘यो पटक त्यस्तो महत्कांक्षी योजनाहरु केही पनि छैनन् उनले भने–‘गत वर्षकै कार्यक्रमहरुलाई निरन्तरता दिइएको छ ।’गाउँपालिकाले विशेष गरी कृषि क्षेत्रलाई उच्च प्राथमिकतामा राखेर नीति तथा कार्यक्रम र बजेट निर्माण गरेको पनि अध्यक्ष पौडेलले बताए ।
सार्वजनिक सेवा प्रवाह र सुशासन प्रबर्धन, पूर्वाधार विकास र पुँजी निमाण, शिक्षामा गुणात्मक विकास, कृषि क्षेत्रको व्यवसायीकरण, बजारीकरण र आधुनिकीकरण, आयआर्जन र स्वरोजगार र मानव संशाधन विकास, वातावरण संरक्षण र विपद् व्यवस्थापन प्राथमिकतामा राखिएको छ । आर्थिक, सामाजिक विकासका साथै बहुवर्षीय योजना तथा चालु आर्थिक वर्षका अधुरा आयोजनालाई सम्पन्न गर्न प्राथमिकता बजेट विनियोजन भएको अध्यक्ष पौडेलले बताए ।
बालमैत्री, वातावरणमैत्री, लक्षितवर्गमैत्री, स्थानीय शासन, दिगो विकास र विकासका साझा सवाललाई नीति तथा कार्यक्रममा प्राथमिकतामा राखिएको उनको भनाइ छ । गाउँपालिकाको आन्तरिक आय, अन्तर सरकारी वित्त हस्तान्तरण, राजश्व बाँडफाँट तथा रोयल्टी रकमलाई यथार्थ विश्लेषणगरी समय सापेक्ष ढंगले नीति तथा कार्यक्रम तय गरेको पनि अध्यक्ष पौडेलको प्रष्टोक्ती छ । वडाको बजेटको सिलिङ केही बढाइएको पनि उनले जानकारी दिए ।
गाउँपालिकाा उपाध्यक्ष मनिषा सिंह थारुले पनि यो पटक बजेटको सिलिङ घटेकाले नयाँ योजनाहरुलाई खासै प्राथमिकता नदिइएको जानकारी दिइन् । उनले पनि पूर्वाधार विकाससँगै शिक्षा, स्वास्थ्य, कृषिलाई बढी प्राथमिकता दिइएको बताइन् । उनले गत वर्षको भन्दा वडाको बजेट सिलिङ थोरै बढाइएको जानकारी दिइन् । गत वर्ष प्रत्येक वडामा रु ८५ लाखका दरले बजेट पठाइएको थयो । तर यो पटक भने रु १० लाख बढाएर रु ९५ लाख बजेट वडामा पठाइएको छ ।
Discussion about this post