लुम्बिनी असार २१ गते ।
लुम्बिनी प्रदेशमा नयाँ सहमतिको सरकार बनाउन नेकपा (एमाले)ले अग्रसरता लिएको छ । एमालेले लुम्बिनीमा सहमतिको सरकार बनाउने भन्दै प्रदेश प्रमुख अमिक शरेचनलाई औपचारिकरुपमा पत्र बुझाएको छ ।
एमाले लुम्बिनी प्रदेशका प्रमुख सचेतक तुलसी चौधरीले लुम्बिनी प्रदेशमा सहमतिको सरकार गठनका लागि पहल सुरु भएको बताउँदै लुम्बिनी प्रदेश प्रमुखको कार्यालयलाई औपचारिक जानकारी गराएको बताए ।
यसअघि एमालेले बिहीवार साँझ नेकपा (माओवादी केन्द्र)का संसदीय दलका नेता मुख्यमन्त्री जोखबहादुर महरासमक्ष सरकारलाई दिएको समर्थन फिर्ता लिएको पत्र बुझाएको थियो । बिहीबार साँझ नै लुम्बिनी प्रदेशमा एमालेका मन्त्रीहरुले राजीनामा दिएका थिए । प्रमुख सचेतक चौधरीले सहमतिको सरकार गठनको प्रक्रियालाई छिट्टो अगाडि बढाउन प्रदेश प्रमुखको कार्यालयलाई आग्रह गरिएको जानकारी दिए ।
प्रदेश प्रमुख अमिक शेरचन बुटवल बाहिर रहेकोले प्रदेश प्रमुखको कार्यालय बुटवलकी उपसचिव धर्मा अर्यालले एमालेका तर्फबाट जानकारी पत्र बुझ्दै प्रदेश प्रमुखको निर्देशन अनुरूप अगाडि बढ्ने बताइएको छ ।
Discussion about this post