बाँके असार २८ गते ।
इस्लाम धर्मावलम्वीको पवित्र पर्व मोहर्रमलाई ब्यवस्थित बनाउने विषयमा विभिन्न धर्मका अगुवा वीच बिहिबार नेपालगन्जमा छलफल भएको छ । बाँकेका प्रहरी प्रवक्ता डिएसपी नारायण डाँगीको अध्यक्षतामा वडा प्रहरी कार्यालय नेपालगन्जमा भएको छलफल कार्यक्रममा विभिन्न धर्मका अगुवाले मोहर्रम पर्वलाई सभ्य र भब्य बनाउन सहयोग गर्ने प्रतिवद्धता जनाए ।
सो अवसरमा मोहर्रम पर्व तथा कर्बला व्यवस्थापन समितिका केन्द्रिय अध्यक्ष फिरोज हल्वाई वारसीले सवै जातजाति, धर्म र सम्प्रदायको साथ, सहयोगले नेपालगन्ज सद्भावको सहरको रुपमा स्थापित भएको बताए । उनले मोहर्रम पर्वलाई सभ्य, भब्य, मर्यादित र ब्यवस्थित बनाउन सवै धर्म, जातजाति र सम्प्रदायसँग अपिल गरे ।
हिन्दु धर्मावलम्वीका अगुवाको समेत सहभागिता रहेको छलफलमा धार्मिक सामाजिक सद्भाव समिति नेपालगन्जका संयोजक दीपक लोधले इस्लाम धर्मावलम्वीको पवित्र पर्व मोहर्रमलाई सभ्य र ब्यवस्थित बनाउन आफूले सक्दो सहयोग गर्ने प्रतिवद्धता जनाए । उनले भने, ‘आपसी भाइचार, प्रेम र सद्भावले नेपालगन्जलाई सद्भावको सहरको रुपमा चिनाउन सफल भएका छौँ । अघिल्ला पर्व जस्तै मोहर्रमलाई पनि सभ्य र भब्य बनाउन हाम्रो सहयोग रहने छ ।’
मोहर्रमलाई लक्षित गरि सुरक्षाकर्मी परिचालन गरिएको बाँकेका प्रहरी प्रवक्ता डिएसपी नारायण डाँगीले जानकारी दिए । उनले मोहर्रम पर्बलाई लक्षित गरि नेपालगञ्जमा ड्रोन क्यामेरा मार्फत निगरानी गरिने बताए । ‘सम्वेदनशिल क्षेत्रको पहिचान गरि सुरक्षाकर्मी परिचालन गरिएको छ । त्योसँगै ड्रोन क्यामेरा मार्फत निगरानी भइरहेको छ,’ उनले भने ।
मोहर्रम पर्बको अवसारमा आज पाँचौ दिन इस्लाम धर्मावलम्वीको भिड्भाड देखिएको छ । इस्लामिक नयाँ वर्ष हिजरी संवत्को १–१० तारिखसम्म मोहर्रम मनाउने गरिन्छ । ‘मोहर्रमका अवसरमा इस्लाम धर्मावलम्वीले ९ तारीखका दिन ताजिया स्थापना गर्दछन् ।
स्थापना गरिएका ताजियाको संख्या, बस्तुस्थिती र सुरक्षा अवस्था बुझ्न जिल्ला प्रहरी कार्यालय बाँके एवम् वडा प्रहरी कार्यालयले ड्रोन मार्फत अनुगमन गर्ने वडा प्रहरी कार्यालयका प्रहरी निरीक्षक हरिबहादुर विसीले अनलाईन खोजखबरलाई जानकारी दिए । ‘कुनै अप्रिय घटना हुन नदिन उच्च सतर्कता अप्नाइएको छ । ठूलो संख्यामा सादा पोशाकका प्रहरी सदरलाइन, त्रिभुवन चोक, त्रिवेणी मोड, धम्बोझी, फुल्टेक्रा रोड, घरबारी टोललगायतका घरका छतमा प्रहरी राखेर निगरानी गरिने छ,’ उनले भने ।
धार्मिक गुरु हजरते इमामे हुसैनको सम्झनास्वरूप मनाइने यो चाडमा गुरुको प्रतिक स्वरूप तहाजियाको पूजा गरिने प्रचलन रहेको छ । घर–घरमा ताजिया राखेर पूजा गरिने भएकोले यो पर्वमा नेपालगन्जका घर, आँगन र सडक ताजियाले झकिझकाउ हुने गरेको छ ।
Discussion about this post