बाँके साउन ५ गते ।
नेपालगन्जमा विपद् व्यवस्थापनका लागि सामुदायिक आपत्कालीन प्रति कार्य टोली निर्माण गरेर चार सय जना स्वयंसेवकलाई खोज तथा उद्धार प्राथमिक उपचार र आगलागी नियन्त्रण सम्बन्धी तालिम दिइएको छ ।
चार सय जनालाई कृत्रिम घटना अभ्यासमा संलग्न गराइएको स्थानीय आपत्कालीन कार्य सञ्चालन केन्द्रका सूचना व्यवस्थापन अधिकृत रुपन ज्ञवालीले जानकारी दिए ।
नेपालगन्जमा सञ्चालन गरिएको सहरी विपद् तथा भूकम्पीय पूर्व तयारी परियोजनाले गर्दा विपद् व्यवस्थापन तथा पूर्व तयारीका विभिन्न प्रभावकारी काम गरिएको नेपालगन्ज उपमहानगरका उप–प्रमुख कमरुद्दीन राईले बताए । उनले नगरमा विपद् व्यवस्थापनका लागि सञ्चालित परियोजनाले ठुलो सहयोग पुगेको भन्दै उपमहानगरपालिकाले आगामी दिनमा विपद्को समयमा प्रभावकारी कार्य गर्ने क्षमता विकास भएको बताए ।
नेपाल रेडक्रस सोसाइटी बाँके सभापति गोवर्द्धन सिंह सम्झनाले नेपालगन्जका केही पुराना बस्ती भूकम्पको धेरै ठुलो जोखिममा रहेकोले सञ्चालन गरिएको आवासीय बिमा कार्यक्रमले निकै राहत पुग्ने बताए ।
विपद् समिति नेपालगन्जका संयोजक समिरप्रताप सिंहले कुनै पनि विपद्का लागि नेपालगन्जलाई नयाँ तरिकाले पूर्ण रूपमा तयार पारिएको र क्षतिलाई कम भन्दा कममा सीमित पार्ने योजना रहेको बताए ।
Discussion about this post