बाँके असार १६ गते ।
राष्ट्रिय गौरबको सिक्टा सिंचाई आयोजनाले पछिल्लो समय तीब्र गतिमा काम अघि बढाएको छ । बाँकेको ४३ हजार हेक्टर क्षेत्रफलमा सिंचाई सुविधा पु¥याउने उद्देश्यका साथ निर्माणाधीन आयोजनाले पछिल्लोपटक पश्चिम मूल नहरको छैठौं शाखा नहर निर्माण सम्पन्न गरेर पानी छोडेको छ ।
बैजनाथ गाउँपालिका वडा नम्बर ५ मा निर्मित गुरुवागाउँ शाखा नहरमा सोमवार पानी परीक्षण कार्य गरिएको छ । पानी परीक्षण कार्यको आयोजना प्रमुख राजु आचार्य, बैजनाथ गाउँपालिका वडा नम्बर ५ का वडा अध्यक्ष देब बहादुर रावत, वडा नम्बर ६ का अध्यक्ष भुपाल पुन मगर, सिक्टा सिंचाई आयोजना जल उपभोक्ता समितिका अध्यक्ष शालिकराम डाँगी, नेपाल पत्रकार महासंघ बाँकेका अध्यक्ष नवीन गिरी लगायतले संयुक्तरुपमा पानी छाडेर शुभारम्भ गरे ।
भैरब सुभानी जेभी काठमाडौंले तीन बर्षभित्र काम सम्पन्न गर्ने गरी २०८० चैत १८ गते सम्झौता गरेकोमा सम्झौता अवधि अगावै काम सम्पन्न भएको छ । २०८३ चैत १७ गते सम्पन्न गर्नुपर्ने मिति हो । ३७ करोड ८२ लाख ८४ हजार ७ सय ३५ रुपैयाँमा ठेक्का गरिएको आयोजनाका इन्जिनियर विनेश श्रेष्ठले बताए । उनका अनुसार हालसम्म ९८ प्रतिशत भौतिक प्रगति भएको छ ।
अब केही सामान्य फिनिसिंगको काम मात्र बाँकी छ । कुल ११ किलोमिटर लामो यो नहरबाट ७ हजार ८१ हेक्टर क्षेत्रफलमा सिंचाई सुविधा पुग्ने इन्जिनियर श्रेष्ठले बताए । गुरुवागाउँ नहरबाट एक लाख जनसंख्या लाभान्वित हुनेछन् । नहरमा पानी छोडिएपछि किसान हर्षित भएका छन् ।
Discussion about this post