बाँके भदौ १२ गते ।
जनता समाजबादी पार्टी (जसपा) का महासचिव मोहम्मद इस्तियाक राईले उपेन्द्र यादवले नेतृत्व गरेको जसपा नेपाल विधि–विधान र लोकतान्त्रिक मूल्य–मान्यतामा नचलेकै कारण नयाँ पार्टी गठन गरेको स्पष्ट पारेका छन् । उनले काम गर्ने र पार्टीलाई अगाडी बढाउन चाहने नेता, कार्यकर्ताको जसपा नेपालले कुनै स्थान नदिने परिपाटी पुरानै भएको आफ्नो फेसबुक वालमा लेखेका छन् । उनी अगाडी लेख्छन्, ‘जसपा नेपालमा स्वेच्छाचारी र निरंकुशताको बोलवाला छ । उपेन्द्र यादवको नेतृत्वमा रहेको पार्टी (जसपा नेपाल) भित्र यो सुरुवातदेखि नै देखिँदै आएको रोग हो ।’
उपेन्द्र यादवको पछिल्लो स्वेच्छाचारी प्रहार (षड्यन्त्रपूर्ण केन्द्रीय पदाधिकारी/कार्यकारिणी र सदस्यहरू चयन) ले यो रोग अब निको नहुने गरी फैलिएको प्रष्ट भएको उनले बताएका छन् । ‘पार्टीलाई मजबुत पार्ने योगदानकर्ताहरूको अपमान गर्ने जसपा नेपालको नियति नै बनिसकेको छ । उपेन्द्र यादव ‘नेता’ रहँदासम्म अब त्यहाँ सङ्घर्ष, पद्दति र विधि–प्रक्रियाले कुनै स्थान पाउने सम्भावना नै छैन,’ उनले आफ्नो फेसबुक वालमार्फत धारणा सार्वजनिक गरेका छन् ।
विगतका बर्षहरुमा उपेन्द्र यादवले आफूहरुलाई उकुसमुकुसमा पारेको आरोप लगाउँदै महासचिव राईले सिध्याउने योजनाका साथ जालझेल रचेको जिकिर गरे । उनी लेख्छन्, ‘उपेन्द्रले हामीलाई सक्नका लागि बनाएको योजनाका आधारहरू अहिले छर्लङ्ग भएको छ । जसपा नेपालकै कयौं साथीहरूले आफ्ना असन्तुष्टिहरू फेसबुकमार्फत व्यक्त गरिरहनु भएको छ ।
हामी फेरि पनि भन्छौं, उपेन्द्र यादवको निरंकुशताका अगाडि कसैको संघर्ष र सामर्थ्यको सुनुवाइ हुने गुन्जायस छैन । यो कुरा बुझ्न हामीले धेरै महत्वपूर्ण समय गुमाएकोमा थोरबहुत अफसोस र दुख पक्कै छ, कामना गर्छौं त्यहाँ अन्यायमा परेका साथीहरूले थप दुख मनाउ गर्नु नपरोस ।’
विभाजन र नेताहरू लगातार बहिर्गमन भइरहनु उपेन्द्र यादव नेतृत्वको जसपा नेपालको नियमित आकस्मिकता जस्तै भइसकेको बताएका छन् । मधेश तथा आदिवासी–जनजाति र जनयुद्ध लगायत आन्दोलनका प्रभावशाली नेतृत्वकर्ता किशोर विश्वास, भाग्यनाथ गुप्ता, जितेन्द्र सोनल, अमर यादव, विजयकुमार गच्छदार, जेपी गुप्ता, सरिता गिरि, महन्थ ठाकुर, बाबुराम भट्टराई, अशोक राई जस्ता व्यक्तित्व र उनीहरूको विचार समूहको अवमूल्यन गर्दै विभाजनमा धकेल्ने उपेन्द्र यादवको निरंकुश शैलीबाट भविष्यमा पनि विभाजन र बहिर्गमनका अरू अध्यायहरू थपिने निश्चित भएको उनले स्पष्ट पारेका छन् ।
अधिकार प्राप्तिको आन्दोलनमा प्राण उत्सर्ग गर्ने शहीद र तिनका परिवारहरूको समेत सम्मान नगर्ने, बरू उल्टो उनीहरूलाई भजाएर निरन्तर आफ्नो स्वार्थसिद्धिमा लागेका उपेन्द्र यादव र उनको पार्टीको पतन अवश्यम्भावी छ। आज कर्मठ नेता–कार्यकर्ता तहबाट यसको संकेत देखिन थालेको छ, ढिलोचाँडो जनताको तहबाट पनि परिणाम पक्कै देखिने छ।
मधेसको मुद्धालाई विगतदेखी नै भजाएर आफ्नो स्वार्थ पूर्ति गर्ने उपेन्द्र यादवको निरकुंश र स्वच्छाचारी प्रवृतीलाई अझैपनि कहिलेसम्म सहेर बस्ने साथीहरु ? पार्टीभित्रको अलोकतान्त्रिक, स्वच्छाचारी र तदर्थवादमा रमाउने उपेन्द्र यादव प्रवृतिलाई चिर्न तपाईहरुले अव आफ्नो विवेक प्रयोग गर्ने बेला आएको छैन र ? पार्टीभित्र अध्यक्षको हैकमवादी र एकलौर्टी निरंकुशवादी चरित्र सहेर आफुहरुलाई परेको अन्याय र अत्याचारविरुद्ध बोल्न सक्नुहुन्न भने आम नागरिकको हित र उनीहरुले सदियौदेखी भोग्दै आएका दुखः, पिडा र अत्याचारविरुद्ध कसले आवाज उठाउने ?
तसर्थ आउनुहोस लोकतान्त्रिक मुल्य मान्यता र आत्मसम्मानलाई अगिंकार गर्दै राजनीतिक सहकार्यका लागि छलफल गरौ । संघिय लोकतान्त्रिक गणतन्त्रात्मक व्यवस्थामा पार्टी नेतृत्व अलोकतान्त्रिक र निरंकुशवादी भए त्यसले जनताको भलो किमार्थ गर्न सक्दैन । त्यसैले पार्टीमा विधी र पद्धतीलाई सर्वोपरी ठानेर राजनीतिक हातेमालो गरौ , त्यसका लागि हाम्रो पार्टी (जनता समाजवादी पार्टी)सदैव तयार छ ।
Discussion about this post