बाँके, भदौ ७ गते ।
मक्का मस्जिद व्यवस्थापन समितिले आयोजना गरेको निःशुल्क स्वास्थ्य शिविरबाट चार सयभन्दा बढी नागरिक लाभान्वित भएका छन्।
पैगम्बर हजरत मोहम्मदको जन्मदिनको अवसरमा आयोजना गरिएको शिविरमा विभिन्न स्वास्थ्य समस्या भएका स्थानीयले स्वास्थ्य परीक्षण, चिकित्सकीय परामर्श र आवश्यक औषधि निःशुल्क प्राप्त गरेका थिए।
शिविरमा फिजिसियन डा. अलतबान राही, फिजिसियन डा. मोहम्मद आजम, हाडजोर्नी तथा नसा रोग विशेषज्ञ डा. सैयद सद्दाम र मेडिकल अधिकृत डा. अजहर हुसैन फारुकीले स्वास्थ्य परीक्षण तथा परामर्श दिएका थिए।
समितिका अध्यक्ष खलिल मियाँले समुदायका नागरिकलाई सहज रूपमा स्वास्थ्य सेवा उपलब्ध गराउने उद्देश्यले शिविर आयोजना गरिएको बताए। उनले आगामी दिनमा पनि समुदायको हितमा सामाजिक तथा स्वास्थ्यसम्बन्धी कार्यक्रमलाई निरन्तरता दिने बताए।
कार्यक्रममा समाजसेवी मेराज अहमद हिमालयले शिविरको अवलोकन गरेका थिए। उनले सेवाग्राही तथा स्वास्थ्यकर्मीसँग स्वास्थ्य सेवाबारे जानकारी लिएका थिए।
कार्यक्रम संयोजक आशिफ कुरैशीले शिविरबाट चार सयभन्दा बढीले स्वास्थ्य सेवा लिएको बताए। उनका अनुसार शिविरमा स्वास्थ्य परीक्षणसँगै आवश्यक औषधि पनि निःशुल्क वितरण गरिएको थियो।
कार्यक्रममा समितिका उपाध्यक्ष मोहम्मद आसिफ अन्सारी, सचिव मोहम्मद साहिल अन्सारी, कोषाध्यक्ष शमसाद हुसैन शेख तथा सदस्यहरू आशिफ कुरैशी, मोहम्मद सलमान सलमानी, साबिर अली शेख, शमसाद अली र सद्दाम कुरैशीलगायतको उपस्थिति थियो।
Discussion about this post