लुम्बिनी मंसिर ७ गते ।
लुम्बिनी प्रदेश सरकारको भौतिक पूर्वाधार विकास मन्त्रालयले असारे विकास प्रवृत्ति रोक्न जेठ महिनामै निर्माणको काम सक्ने गरी योजना कार्यान्वयन तीव्र पारेको छ । भौतिक पूर्वाधार विकास मन्त्रालयले कार्यान्वयन चरणमा रहेकामध्ये ८ वटा पक्की पुल, २० किलोमिटर सडक कालोपत्र, दुईवटा झोलुंगे पुल यो चार महिनाको अवधमिा सम्पन्न गर्दै योजना कार्यान्वयनलाई तीव्र पारेको हो ।
लुम्बिनी प्रदेशको सडक सञ्जाल गुरुयोजना निर्माणको काम गरिरहेको मन्त्रालयले चालु आर्थिक वर्षमा विनियोजन भएका योजना कार्यान्वयनलाई तीव्रता दिएको छ। चालु आर्थिक वर्षमा विनियोजन भएका सबै आयोजनाको काम जेठ महिनाभित्र सम्पन्न गर्ने गरी कार्यसम्पादनको काम अघि बढेको हो ।
असारे विकासलाई निरुत्साहित गर्न जेठ महिनाभित्र सबै निर्माणको काम सम्पन्न गर्ने लक्ष्य रहेको भौतिक पूर्वाधार विकास मन्त्री भूमिश्वर ढकालले बताए । बिहीबार मन्त्रालयमा चौमासिक समीक्षा कार्यक्रमको आयोजना गर्दै मन्त्री ढकालले योजना कार्यान्वयनलाई तीव्रता दिन निर्देशन दिएका हुन् । ‘असारे विकासको प्रवृत्ति रोक्नका लागि यसपालि कडाइका साथ कार्यसम्पादनको कामलाई अघि बढाएका छौं,’ उनले भने, ‘कार्ययोजना निर्माण गरेर कामलाई गति दिइएको छ भने गुणस्तरीयताका बारेमा आयोजनाको अनुगमनलाई पनि तीव्र पारेका छौं ।’
भौतिक पूर्वाधार विकास मन्त्रालयले कार्यान्वयन गर्ने चालु आर्थिक वर्षमा २ हजार १ सय २० योजना छन् । जसमध्ये बहुवर्षीय आयोजनाको रूपमा ८४ वटा आयोजना प्रस्तावित छन् । यो चार महिनाको अवधिमा ३८ वटा आयोजना सम्पन्न भइसकेका छन् । कार्यान्वयनको चरणमा सात सय ७९ वटा आयोजना रहेको मन्त्रालयलका सचिव भीमार्जुन पाण्डेले बताए । ‘यो चार महिनाको अवधिमा योजनाहरू ठेक्का लगाउन चाहिने कार्यविधिहरू निर्माण गर्यौं । ठेक्का पनि लगायौं ।
अब कार्यान्वयनको गति अघि बढेको छ,’ उनले भने, ‘सबै हिसाबले कार्यसम्पादनलाई उत्कृष्ट बनाउने गरी काम अघि बढेको छ ।’ ९ सय २ आयोजना खरिद प्रक्रियामा रहेका छन् । जम्मा आयोजनामध्ये २ सय ८९ वटा आयोजना अब कार्यान्वयनमा लैजाने अन्तिम तयारी छ । कार्यान्वयनको चरणमा रहेका आयोजनामध्ये चार महिनाको अवधिमा २० किलोमिटर सडक कालोपत्र गरिएको छ । १० किलोमिटर सडक कालोपत्रको काम अन्तिम चरणमा छ ।
६ किलोमिटर सडक नयाँ ट्रयाक खोलिएको छ । २४ किलोमिटर सडक विस्तार गरिएको छ । ६ किलोमिटर सडक ग्राभेल गरिएको छ । ढलान गरेको चार सय मिटर पक्की सडक निर्माण भएको छ । कल्भर्ट तथा साना पुल पुलेसा ३० वटा सम्पन्न भएको वार्षिक समीक्षामा जानकारी गराइएको थियो ।
मन्त्रालयका अनुसार पक्की नाला १३ किलोमिटर निर्माण गरिएको छ । १ हजार ९ सय घनमिटर तारजालीसहितको टेवा पर्खाल निर्माण गरिएको छ । पक्की मेसिनरी टेवा पर्खाल २ हजार ४ सय घनमिटर निर्माण गरिएको छ । यो अवधिमा ८ वटा सडक पुल र दुई वटा झोलुंगे पुल निर्माण सम्पन्न भएका छन् । मन्त्रालयले चार महिनाको अवधिमा पुँजीगत खर्च ६ दशमलव ८ प्रतिशत पुर्याएको जनाएको छ । अब पुँजीगत खर्चको दर ह्वात्तै बढ्ने मन्त्रालयको दाबी छ ।
Discussion about this post