बाँके असार २८ गते ।
बाँकेमा तीन वटा स्थानीय तह जानकी गाउँपालिका, डुडुवा गाउँपालिका र नेपालगन्ज उपमहानगरपालिकाले वित्तीय प्रगति सार्वजनीक गरेका छैनन् । बाँकेको बैजनाथ गाउँपालिकाले आर्थिक वर्ष २०८१–०८२ मा उल्लेखनीय वित्तीय प्रगति गर्दै कुल ९२.३१ प्रतिशत वित्तीय प्रगति हासिल गरेको छ ।
लेखा अधिकृत पूर्णप्रसाद भट्टराईका अनुसार चालु खर्चतर्फ ८४.६४ प्रतिशत र पूँजीगत खर्चतर्फ ८४.१२ प्रतिशत खर्च गरिएको छ । औसत खर्च ८४.४५ प्रतिशत रहेको भट्टराईले जानकारी दिए । बैजनाथ गाउँपालिकाले पनि चालु तथा पुँजिगत खर्च सन्तुलित ढंगले बजेट प्रयोग गर्दै चालु आवलाई सम्पन्न गरेको छ । आर्थिक अनुशासन र खर्च व्यवस्थापनमा सुधार आएको देखिएको छ । गाउँपालिकाले शिक्षा, स्वास्थ्य, पूर्वाधार विकास, कृषि, सामाजिक सुरक्षा लगायतका क्षेत्रमा बजेट विनियोजन गर्दै जनतामुखी कार्यक्रमहरू कार्यान्वयनमा जोड दिएको थियो ।
आर्थिक पारदर्शीता, अनुगमन र मूल्यांकनमार्फत वित्तीय अनुशासन कायम गर्न भूमिका खेलेको गाउँपालिका प्रमूख प्रशासकीय अधिकृत धर्मराज न्यौपानेले बताए । उनले आगामी वर्षमा थप प्रभावकारी ढंगले बजेट कार्यान्वयन गरिने बताए । प्रमूख प्रशासकीय अधिकृत न्यौपानेका अनुसार गाउँपालिकाले कुल ९२.३१ प्रतिशत बित्तीय प्रगति हासिल गरेको छ । गाउँपालिकाका लेखा अधिकृत पूर्णप्रसाद जैसीका अनुसार चालु खर्चतर्फ ८४.६४ प्रतिशत र पूँजीगत खर्चतर्फ ८४.१२ प्रतिशत खर्च गरिएको छ ।
औसत खर्च ८४.४५ प्रतिशत छ । लेखा अधिकृत जैसीले भने, ‘आर्थिक अनुशासन र खर्च व्यवस्थापनमा सुधारसँगै आर्थिक पारदर्शिता, अनुगमन र मूल्यांकनमार्फत वित्तीय अनुशासन कायम भएको छ ।’ चालु आर्थिक बर्ष २०८१–०८२ मा नरैनापुर गाउँपालिकाले विनियोजन गरेको कुल बजेट रु.५९ करोड ४७ हजारमध्ये ८६.०४ प्रतिशत वित्तीय प्रगति गरेको जनाएको छ ।
नरैनापुर गाउँपालिकाले चालुतर्फ ९०.०५ प्रतिशत र पुँजीगततर्फ ७८.०३ प्रतिशत वित्तीय प्रगति गरेको गाउँपालिकाका प्रमूख प्रशासकीय अधिकृत नवराज ओलीले जानकारी दिए । त्यस्तै खजुराको गाउँपालिकाले आर्थिक वर्ष २०८१–०८२ मा चालु तथा पुँजिगततर्फ ८४.४५ प्रतिशत बित्तीय प्रगति गरेको छ । गाउँपालिकाले आर्थिक वर्ष २०८१–०८२ मा विनियोजन गरेको कुल रु.७८ करोड ९२ हजार ७५५ मध्ये रु.७० करोड १ लाख ९ हजार ४८१ (९५.९९ प्रतिशत) खर्च गरेको छ ।
खजुराको गाउँपालिकाले आर्थिक वर्ष २०८१–०८२ मा विनियोजन गरेको चालुतर्फको रु.५६ करोड ५१ लाख ८३ हजार २६९ मा रु.५२ करोड ५ लाख ८३ हजार ३५० (९१.११ प्रतिशत) र पुँजिगततर्फ रु.२१ करोड ४८ लाख नौं हजार ४८६ मध्ये रु.१७ करोड ९५ लाख २६ हजार १३१ (८३.५४ प्रतिशत) खर्च गरेको छ । गाउँपालिकाका बजेट अनुसार चालु तथा पुँजिगततर्फ ८९.७४ खर्च गरेको देखिन्छ भने आम्दानीका आधारमा भएको खर्चको प्रतिशत ९५.९९ प्रतिशत रहेको देखिन्छ । खजुरा गाउँपालिकाले आर्थिक वर्ष २०८१–०८२ मा कुल आम्दानी रु.७२ करोड ९३ लाख २६ हजार ३३१ आम्दानी गरेको छ ।
गाउँपालिकाले चालु तथा पुँजिगत खर्च सन्तुलित ढंगले बजेट प्रयोग गर्दै चालु आवलाई बिदाई गरिएको गाउँपालिकाका प्रमूख प्रशासकीय अधिकृत बसबहादुर रानाले जानकारी दिए । उनले भने, ‘पुँजीगत खर्च बढाउन थुप्रै कठिनाइहरू हुँदाहुँदै हामीले सन्तोषजनक रुपमा प्रगति गरेका छौं । आगामी बर्ष यसलाई शतप्रतिशत पर्याउँछौं ।’ खजुरा गाउँपालिकाको आम्दानीको आन्तरिक स्रोतसमेत न्यून रहेको पनि उनले बताए । आगामी आर्थिक वर्षमा दक्ष जनशक्तिको परिचालनलाई प्रभावकारी बनाउँदै शतप्रतिश खर्च गरिने खजुरा गाउँपालिकाका लेखा अधिकृत प्रदीप सुनारले बताए । उनले भने, ‘स्थानीय सरकारलाई थप मजबुत बनाउन कर्मचारीहरुको सक्रियताले हामी धेरै सफल भएका छौं ।’
त्यसैगरी कोहलपुर नगरपालिकाले औसतमा ८२.८९ प्रतिशत प्रगति गरेको छ । नगरपालिकाका अनुसार चालुतर्फ ८८.१० प्रतिशत र पूँजीगततर्फ ७३.२६ प्रतिशत खर्च भएको जनाएको छ । राप्तीसोनारी गाउँपालिकाको वित्तीय प्रगति ७७.२४ प्रतिशत रहेको छ । गाउँपालिकाले चालुतर्फ रु.५५ करोड ५३ लाख १३ हजार २६० (८२.८५ प्रतिशत) र पूँजीगततर्फ रु.१७ करोड १० लाख ५५ हजार ६६० (६३.३३ प्रतिशत) खर्च भएको छ । राप्तीसोनारीले आर्थिक वर्ष २०८१–०८२ मा चालुतर्फ रु.६७ करोड २ लाख ३३ हजार ३३० र पूँजीगततर्फ रु.२७ करोड ९८ हजार ७२० गरी रु.९४ करोड ३३ लाख २ हजार विनियोजन गरेको थियो ।
राप्तीसोनारी गाउँपालिकाका प्रमूख प्रशासकीय अधिकृत दानबहादुर ऐडीले आर्थिक वर्ष २०८१–०८२ को भुक्तानी प्रक्रिया बन्द हुँदासम्म पुँजिगततर्फ ठेक्का घटी कबोल भएको, क्रमागत आयोजनाको बील समयमा प्राप्त नभएको, प्रदेश राजस्व बाँडफाँड र सशर्त अनुदानको सम्पूर्ण रकम प्राप्त नभएकाले पुँजिगततर्फ लक्ष्यभन्दा केही कम प्रगति देखिएको भए पनि भौतिक प्रगति उल्लेख्य रहेको जानकारी दिए । आठ वटा स्थानीय तह रहेको बाँकेमा पाँच वटा स्थानीय तहले वित्तीय प्रगति सार्वजनीक गरे पनि तीन वटा स्थानीय तह जानकी गाउँपालिका, डुडुवा गाउँपालिका र नेपालगन्ज उपमहानगरपालिकाले वित्तीय प्रगति सार्वजनीक गरेका छैनन् ।
Discussion about this post