बाँके पुस १५ गते ।
बाँके प्रहरीले पाँच महिनाको अवधिमा २३० जना फरार प्रतिवादीलाई पक्राउ गरेको छ । चालू आर्थिक वर्षको साउनदेखि मंसिर महिनासम्म अदालतबाट दोषी ठहर भई सजाय भुक्तान नगरी फरार रहेका २३० जनालाई पक्राउ गरिएको बाँकेका प्रहरी प्रवक्ता डिएसपी आयुस जोशीले जानकारी दिए ।
उनीहरुबाट ६६ बर्ष २७ दिन कैद असल गरिएको पनि उनले बताए । यस्तै १९ लाख १९ हजार ७४७ रपैयाँ जरिवाना समेत असूलउपर गरिएको डिएसपी जोशीले बताए । यो अवधिमा विभिन्न खाले ५९५ वटा मुद्दा जिल्ला प्रहरी कार्यालयमा दर्ता भएको छन् । ५६७ जना ब्यक्तीहरुलाई पक्राउ गरी कानूनी दायरामा ल्याईएको पनि प्रहरीको तथ्यांकमा उल्लेख गरिएको छ । सर्दै आएका १७० वटा मुद्दाहरु फर्छौट गरिएको छ । डिएसपी जोशीले भने–‘ठाडो उजुरी १ हजार ८९८ वटा प्राप्त भएको थिए । त्यसमा १ हजार ५६२ फर्छौट भएका छन् । २६० वटा बाँकी निबेदन फर्छौट प्रक्रियामा छन् ।’ महिला बालबालिकासँग सम्बन्धित मात्रै ५९ वटा मुद्दा दर्ता भएका छन् । त्यसमा २६ जनालाई पक्राउ गरी कानूनी दायरामा ल्याईएको उनले बताए ।
घरेलु हिंसा सम्बन्धि २९४ वटा उजुरी प्राप्त भएकोमा २७६ वटा फर्छौट भएको बाँकी अनुसन्धान कारवाही प्रक्रियामा रहेको प्रहरीको तथ्यांकमा उल्लेख छ । हराएका महिला, बालबालिका तथा जेष्ठ नागरीक सम्बन्धमा १८४ वटा निबेदन प्राप्त भएकोमा १११ जना फेला पारी अबिभावकको जिम्मा लगाईएको र बाँकी खोजतलासको क्रममा रहेका छन् । अलपत्र अवस्थामा ५८ जना महिला बालबालिका तथा जेष्ठ नागरिकलाई फेला पारी उद्दार गरिएको र ३७ जनालाई संरक्षणको लागी संस्थामा पठाइएको प्रहरीको तथ्यांकमा उल्लेख छ ।
यस्तै सीमा नाकाहरुबाट २८३ जना महिला तथा बालबालिकाहरुलाई उद्दार गरिएको छ । प्रहरीले यो अवधिमा लागु औषध विरुद्ध पनि प्रभावकारी काम गरेको उल्लेख गरेको छ । पाँच महिनाको अवधिमा १३६ जना लागु पदार्थ ओसारपसारमा संलग्न भएकाहरुलाई पक्राउ गरि कानूनी दायरामा ल्याइएको उनले बताए । ‘लागू औषध ओसारपसार बिरुद्ध योजनाबद्धरुपमा प्रहरी परिचालन गरी ८७१ ग्राम ८५ मिलिग्राम ब्राउन सुगर, नाइट्राजेपाम १ हजार ६०८ ट्याब्लेट, ट्रामाडोल १ हजार २१८ ट्याब्लेट लागू औषध बरामद गरिएको छ उनले भने–‘१३६ जना ओसारपसारकर्ताहरुलार्इ कानूनी दायरामा ल्याईएको छ ।’ प्रहरीले गैरकानूनी रुपमा भइरहेका सुनचाँदीको कारोवारदेखि हुण्डी कारोवारीलाई पनि नियन्त्रणमा लिएको छ । अवैध सुन चाँदी सहित ४ जना मानिसहरु पक्राउ गरि कानूनी दायरामा ल्याईएको जानकारी दिँदै उनले नेपाली ४०लाख १० हजार २५५ रुपैयाँ र भारतिय ५९ हजार ५०० रुपैयाँ सहित ७ जना हुण्डी कारोबारीलाई पक्राउ गरि कानूनी दायरामा ल्याईएको जानकारी दिए ।
यो पाँच महिनाको अवधिमा प्रहरीले ठूलोमात्रामा भन्सार छलिको सामान बरामद गरेको देखिन्छ । प्रहरीको तथ्यांक अनुसार अवैध भन्सार छलिको सामान बरामद गरी २ करोड ८४ लाख २४ हजार २३७ रुपैयाँ बराबरको राजश्व संकलन गरेको छ । त्यसमा प्रहरीले २ वटा जीप, २ वटा कार, ४ वटा मोटरसाईकल र ११ जना मानिस पक्राउ गरी सम्बन्धित निकाय पठाईएको पनि प्रहरीले जनाएको छ ।
ट्राफिक नियमको उल्लंघन गर्ने १३ हजार ४६४ वटा सावरी साधनलाई कारवाही गरिएको छ । प्रहरीले १ करोड १३ लाख ३८ हजार रुपैयाँ राजस्व संकलन भएको जनाएको छ । प्रहरीले अबैध रुपमा भारतबाट ल्याईएका करिव ६ लाख ३० हजार मुल्य बराबरको ६ हजार ३०० वटा बोईलर कुखुराको चल्ला आवश्यक कारवाहीको लागि पशु क्वारेन्टाईन कार्यालय नेपालगन्जमा पठाईएको जनाएको छ ।ती चल्ला नष्ट गरिएको थियो ।
अबैध रुपमा नदिजन्य पदार्थ उत्खनन् गर्ने दुईवटा टिप्पर र ७ वटा ट्याक्टरलाई नियनत्रणमा लिई सम्बन्धित निकायमा पठाईएको र १ लाख २६ हजार जरिवाना असुल उपर गरिएको डिएसपी जोशीले बताए । प्रहरीले अपराध नियन्त्रणका सवालमा मात्रै काम नगरेर समुदा प्रहरीसँगको सहकार्य र समन्वयमा सचेतनामुलक कार्यक्रमहरु गर्दै आएको जनाएको छ । लागु औषध, साइवर अपराध, मानव वेचविखन लगायतका विभिन्न विषयमा समुदायस्तरमा सचेतिकरण कार्यक्रमहरु गर्दै आएको पनि डिएसपी जोशीले बताए । उनले भने–‘समुदाय र प्रहरी सहकार्य अन्तर्गत मातहत सहित गरी २६२ वटा सचेतनामुलक कार्यक्रम मध्ये लागू औषध सम्बन्धि सचेतना २७ वटा, साइबर अपराध सचेतना ९ वटा, मानव बेचबिखन सम्बन्धि सचेतना ११ वटा, आत्महत्या रोकथाम सम्बन्धि २३ वटा, अल्पसंख्यकसंग प्रहरी ८ वटा, नागरिक सुनुवाई ७ वटा र चोरी सम्बन्धि सचेतनामुलक १६ वटा कार्यक्रम संचालन गरिएको छ ।
ट्राफिक सचेतना तर्फ ७८७ वटा सचेतनामुलक कार्यक्रम (लेन अनुशासन,जेब्रा क्रसिङ, ट्राफिक लाईट) संचालन गरिएको छ ।’ यो अवधिमा जिल्ला प्रहरी कार्यालयले आन्तरिक सुदृढीकरण प्रयास समेत गरेको जनाएको छ । उत्कृष्ट प्रहरी इकाई छनौट सम्बन्धि मापदण्ड तयार गरी उत्कृष्ट कार्य गर्ने प्रहरी कार्यालयलाई महिनाको उत्कृष्ट प्रहरी इकाई घोषणा गरि कदर पत्र प्रदान गर्ने गरिएको उनी बताउँछन् ।
जिल्ला प्रहरी कार्यालय बाँकेको बाटो मर्मत, रङ रोगन तथा कार्यालय परिसर मर्मत तथा सौन्दर्यीकरण गरि सेवाग्राही मैत्री वातावरण तयार गरिएको छ । नेपाल प्रहरी कार्य सम्पादन सम्झौता बमोजिम यस कार्यालयको आयोजनामा शसस्त्र प्रहरी बल ३० नं. गणको सहकार्यकमा संयुक्त भिड नियन्त्रण अभ्यास गरिएको छ । उत्कृष्ट कार्य गर्ने २८जना प्रहरी कर्मचारीहरुलाई तिन पुस्तेमा जनिने गरी पुरस्कृत गरिएको र आचरण बिपरित कार्य गर्ने ३ जना प्रहरी कर्मचारीलाई कारवाही गरिएको पनि डिएसपी जोशीको भनाइ छ ।
Discussion about this post