लुम्बिनी पुस १५ गते ।
लुम्बिनी प्रदेशसभाको पाँचौँ अधिवेशन भोलि मंगलबार दिउँसो २ बजे बस्ने भएको छ । प्रदेश प्रमुख कृष्णबहादुर घर्ती मगरले नेपालको संविधानको धारा १८३ को उपधारा (१) अनुसार लुम्बिनी प्रदेशसभाको पाँचौँ अधिवेशन पुस १६ गते दिउँसो २ बजेका लागि आह्वान गरेका हुन् ।
प्रदेश सरकारको पुस ८ गते बसेको बैठकले लुम्बिनी प्रदेशसभाको हिउँदे अधिवेशन आह्वान गर्न सिफारिस गरेको थियो । प्रदेशसभाका सचिव दुर्लभकुमार पुनले मंगलबारको पहिलो बैठकमा आर्थिक मामिला तथा योजना मन्त्रालयले पेस गरेको प्रदेश आर्थिक कार्यविधि तथा वित्तीय उत्तरदायित्व सम्बन्धमा व्यवस्था गर्न बनेको विधेयक पेस हुने बताए ।
‘पहिलो बैठकमा एउटा विधेयक पेस हुने, प्रदेश प्रमुखको प्रदेशसभा आह्वानसम्बन्धी पत्र पढेर सुनाउने र शुभकामना आदानप्रदान मात्र हुन्छ होला,’ उनले भने, ‘प्रदेशसभा कार्य व्यवस्था परामर्श समितिको पुस १६ गते बिहान बस्ने बैठकले अन्य कार्यसूची तय गर्न सक्छ ।’ वित्तीय उत्तरदायित्व सम्बन्धमा व्यवस्था गर्न बनेको विधेयक प्रदेशसभामा दर्ता भएर पिजन होलमा राखिएको छ ।
यसअघि प्रदेशसभाको चौथो अधिवेशनबाट पारित भएर प्रदेश प्रमुखसमक्ष प्रमाणीकरणका लागि पठाइएको प्रदेश निजामती सेवा ऐन–२०८० लाई संशोधन गर्न बनेको विधेयक र स्थानीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयक नेपालको संविधानको धारा २०१ को उपधारा ३ बमोजिम पुनर्विचार गर्न आवश्यक देखिएकोले सन्देशसहित २०८१ असोज २२ गते प्रदेश सभामा फिर्ता गरेका थिए ।
Discussion about this post