बाँके पुस १५ गते ।
लुम्विनी प्रदेश प्रहरी अस्पतालमा निर्माण भएको ‘अप्रेशन थिएटर’ नयाँ भवनको निरीक्षण तथा अनुगमन गरिएको छ । लुम्विनी प्रदेश आन्तरिक मामिला तथा कानुन मन्त्री आदेशकुमार अग्रवालले अस्पताल भवनको निरीक्षण गर्दै जानकारी लिएका छन् ।
साढे तीन तले सुविधा सम्पन्न अत्याधुनिक भवन तोकिएको समयावधिमा निर्माण सम्पन्न भए पनि बाँकी रकम निकासा नभएपछि अझै भवन हस्तान्तरण भएको छैन । २०८१ असार १३ गते तोकिएको समयावधिभित्र भवन निर्माण कार्य सम्पन्न भएपछि अन्तिम भुक्तानीका लागि २०८१ असार २३ गते फाइल पेश गर्दा बजेट अभावको कारण देखाई भुक्तानी रोकिएको थियो ।
चालू आर्थिक वर्षको अहिले ५ महिना भन्दा बढी समय वितिसक्दा पनि भुक्तानी नभएपछि समस्यामा परेको निर्माण कम्पनी सनलाइट÷एनपी कन्स्ट्रक्सन जेवी नेपालगञ्जका संचालक मोहनप्रकाश आचार्यले बताए । उनका अनुसार भवन निर्माण सम्झौताको अवधिभित्रै ऋण सापटी लिएर भए पनि निर्माण कार्य सम्पन्न गरेर समयमा भुक्तानी नहुँदा ठूलो संकट भएको छ ।
भवन निरीक्षणका क्रममा मन्त्रीसमक्ष निर्माण कम्पनीका सञ्चालक आचार्यले आफ्नो समस्या राख्दै बाँकी रकम निकासाका लागि आग्रह गरेका छन् । त्यस क्रममा मन्त्री अग्रवालले मन्त्रालयमा बजेटको अभाव भएकाले चालू आर्थिक वर्षको योजनाको बजेटलाई रकमान्तरण गरी भुक्तानी गर्न सकिने विकल्प भएकाले त्यसका लागि आवश्यक पहल गर्ने बताए । मन्त्री अग्रवालले अत्याधुनिक भवनले अस्पतालको थप सेवा स्तर बृद्धि भएको र प्रहरीलाई मात्र नभई बाहिरका विरामीलाई पनि सेवा प्रदान गर्नमा सहज हुने विश्वास व्यक्त गरे ।
निरीक्षणका क्रममा अस्पतालका प्रमुख प्रहरी बरिष्ठ उपरीक्षक डा. दिपा न्हुच्छे प्रधान र प्रहरी नायब उपरीक्षक डा. श्यामकृष्ण लौडारीले मन्त्री अग्रवाललाई अस्पतालको सेवा सुविधा लगायतका बारेमा जानकारी गराएका थिए ।
भवनको निरीक्षणका क्रममा लुम्विनी प्रदेशका पूर्व मन्त्री तथा प्रदेशसभा सदस्य रत्न खत्रीले अत्याधुनिक भवनले पश्चिम क्षेत्रका प्रहरीलाई औषधि उपचारमा सहयोग पुगेको भन्दै अस्पतालभित्रको विशेषज्ञतालाई बाहिरका आम नागरिकलाई पनि उपलब्ध गराउनुपर्नेमा जोड दिए ।
भुकम्प प्रतिरोधात्मक साना ठूला गरी ६७ कोठा लिफ्टसहितको अत्याधुनिक साढे तीन तले भवन रु. ८ करोड २१ लख ६३ हजार ८३८ (मुल्य अभिबृद्धि करसहित) को लागतमा निर्माण गरिएको निर्माण व्यवसायी आचार्यले बताए ।
उनका अनुसार भवन निर्माणको कार्य सम्पन्न गरेको र अहिले रु. १ करोड ६२ लाख ७५ हजार ८७६ बाँकी रकम लिनुपर्नेछ । २०७९ मसिंरदेखि भवन निर्माण शुरु भएर २०८१ असार १३ गते तोकिएको समयावधिभित्र भवन निर्माण गरिएको थियो ।
Discussion about this post