लुम्बिनी पुस १६ गते ।
लुम्बिनी प्रदेशका मुख्यमन्त्री चेतनारायण आचार्यले मानव अस्तित्व खतरामा पर्न नदिन पारिस्थितिक प्रणालीलाई सन्तुलनमा राख्न जरुरी रहेको बताएका छन् । पाल्पाको वसन्तपुरमा सोमबारदेखि सुरु भएको प्राणी शास्त्रसम्बन्धी राष्ट्रिय सम्मेलनलाई सम्बोधन गर्दै उनले मानवको अस्तित्व जोगाउन सबैपक्ष सचेत रहनुपर्नेमा जोड दिए ।
मानिसको विकास निर्माणको काम र चाहनाका कारण मानव अस्तित्व खतरामा पर्नेगरी काम गर्न नहुनेमा उनले जोड दिए । मुख्यमन्त्री आचार्यले प्रकृति र मानवबिचमा सन्तुलन कायम गरेर मात्र सबैको हित हुने धारणा राखे । आचार्यले लुम्विनी प्रदेश सरकारले वातावरणीय सन्तुलन कायम राखेर योजना तथा कार्यक्रम अगाडि बढाउन तयार रहेको उल्लेख गरे ।
मानव र जीवजन्तुको अस्तित्वका लागि वातावरणीय सन्तुलन राख्न आवश्यक रहेको र त्यसका लागि प्रदेश सरकार सबैपक्षसँग सहकार्य गर्न तयार रहेको बताए । प्रकृतिको मितव्ययी प्रयोग गर्दै दीगो विकासमा प्रदेश सरकारले ध्यान दिएको मुख्यमन्त्री आचार्यले उल्लेख गरे । विज्ञहरूले दिएको सुझाव र अनुसन्धानबाट प्राप्त पृष्ठपोषणलाई कार्यान्वयन गर्न प्रदेश सरकार तयार रहेको उनले जानकारी दिए ।
लुम्विनी प्रदेश जैविक विविधताले धनी भएको बताउँदै उनले जैविक विविधतालाई प्रयोग गरेर समृद्धि हासिल गर्न सकिनेमा जोड दिए । प्राणीशास्त्र केन्द्रीय विभाग र नेपाल जुलोजिकल सोसाइटीको संयुक्त आयोजनामा वसन्तपुरमा नेसनल कङ्ग्रेस अफ जुलोजि सुरु भएको छ ।
प्राज्ञिक, वैज्ञानिक, अनुसन्धानकर्ता र विद्यार्थीलाई प्राणी विज्ञानको सबै पक्षमा अनुसन्धानको निष्कर्ष प्रस्तुत गरिने नेपाल जुलोजिकल सोसाइटीका अध्यक्ष प्राध्यापक प्राडा. महेन्द्र महर्जनले बताए । सम्मेलनमा जैविक विविधता र पारिस्थितिक प्रणाली, मानव वन्यजन्तु द्वन्द्व र न्युनीकरण लगायतका विषयमा छलफल भइरहेको छ । सम्मेलनमा देशभरबाट १५० भन्दा बढी प्राणीशास्त्रमा रुचि राख्ने अनुसन्धानकर्ताहरूको सहभागिता रहेको छ ।
Discussion about this post