बाँके जेठ २७ गते ।
रातको समयमा हुने सडक दुर्घटना न्यूनिकरण गर्न ट्राफिक प्रहरी पोष्ट नेपालगन्जले अभियान थालेको छ । दिउँसोको तुलनामा रातको समयमा सडक दुर्घटना हुने गरेको घटनालाई मध्यनजर गरि रातको समयमा चेकजाँचलाई अभियानको रुपमा थालेको ट्राफिक प्रहरी पोष्ट नेपालगन्जका इन्चार्ज प्रहरी वरिष्ठ नायब निरीक्षक नन्दकुमार पोखरेलले बताए ।
उनले रातको समयमा विपरित दिशाबाट आएको गाडीको लाइटले अगाडी नदेखिने भएकोले रोकिराखेका गाडी, डिभाइडर, पशुचौपाया र मानिसमा ठोकिने गरेको बताए । ‘रातको समयमा घर जान हतार हुन्छ । पाटी र भोजमा सहभागी भएर फर्किनेको संख्या पनि रातको समयमा धेरै हुन्छ,’ उनले भने, ‘यस्तो अवस्थामा सडक दुर्घटना हुने सम्भावना अधिक रहन्छ,’ उनले भने ।
उनले सवारी चालक र यात्रुको सुरक्षाका लागि ट्राफिक प्रहरी दिनरात नभनी सडकमा खटिदै आएको बताए । ‘ट्राफिक प्रहरी आफ्नो लागि भन्दा अरुको सुरक्षाका लागि दिनरात नभनि सडकमा खटिन्छ । रातको समयमा हुने दुर्घटना न्यूनिकरण गर्न हाम्रो अभियान हो । यो महाअभियानमा साथ दिनु भयो भने तपाई हाम्रो सुरक्षा हुनेछ,’ उनले भने ।
उनले यो अभियानलाई धेरैले मन पराएको बताए । ट्राफिक नियम उलंघन गर्नेहरुले यो अभियानलाई गलत रुपमा लिएको बताउँदै उनले सकारात्मक सोँचका साथ अभियानमा साथ दिन आग्रह गरेका छन् । ‘रातको समयमा ट्राफिक प्रहरीलाई पनि आराम गर्ने मन लाग्छ, तर हामी तपाईको सुरक्षाका लागि आफ्नो चाहना मारेर चेकजाँचमा खटिन्छौँ,‘ उनले भने, ‘यो हाम्रो रहर होइन, हाम्रो कर्तब्य र दायित्व हो ।’
उनले रातको समयमा ट्राफिक नियमको पालना गर्न र सकभर रातको समयमा यात्रा नगर्न सुझाव दिएका छन् । ‘ट्राफिक नियम उलंघन गरि मोटरसाइकल चलाएको भन्दै अभिभावकले फोन गर्छन् । मेरो छोरालाई रोक्नुस भन्दै फोन गर्नु हुन्छ । हामीले रोकेपछि धन्यवाद समेत दिनुहुन्छ,’ उनले भने ।
ट्राफिक प्रहरीले चेकजाँचको क्रममा नमस्कार गर्ने अभियान थालेको जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक पुष्करराज पन्तले जानकारी दिए । उनले मुस्कान सहितको सेवालाई प्रभावकारी बनाउन नमस्कार समेत थपेको बताए । ‘चेकजाँचमा खटिने प्रहरी कर्मचारीलाई नम्र ब्यवहार गर्न र नमस्कार गर्न भनेका छौँ,’ उनले भने, ‘पहिले नमस्कार गर्ने र अनिपछि सवारी साधनको कागजात माग्ने निर्देशन भएको छ । सोही बमोजिम ड्यूटीमा खटिने ट्राफिक प्रहरी कर्मचारीले गर्दै आउनु भएको छ ।’
उनले ट्राफिक प्रहरी जहिलै पनि सवारी साधन चालकको हितमा उभिने गरेको बताउँदै गलत अर्थ नलगाउन आग्रह गरेका छन् । ‘सवारी साधन चालक र यात्रुको सुरक्षाका लागि ट्राफिक प्रहरी सडकमा उभिन्छ । सडकमा उभिने ट्राफिक प्रहरीलाई सहयोग गर्नुभयो भने सडक दुर्घटना न्यूनिकरण हुन्छ । सडक दुर्घटना न्यूनिकरण भयो भने तपाई र तपाईको परिवार सुरक्षित हुन्छ,’ उनले भने ।
Discussion about this post