बाँके असार २ गते ।
भारतमा कोरोना संक्रमण फैलिरहेका बेला भारतबाट आउँदै गरेका एक नेपालीमा पनि कोरोना पुष्टि भएको छ । नेपालगन्जको जमुनाह नाकामा एन्टिजेन किटमार्फत कोरोना जाँच गर्दा एक जनामा कोरोना पुष्टि भएको हो ।
भारतको देहरादुनबाट फर्किदै गरेका बर्दिया राजापुरका २६ वर्षीय युवकमा कोरोना पुष्टि भएको नेपालगन्ज उपमहानगरपालिका स्वास्थ्य महाशाखा प्रमुख रामबहादुर चन्दले जानकारी दिए । भारतबाट साथमा आएका उनका साथीमा भने कोरोना पुष्टि नभएको चन्दले बताए ।
चार दिनयता जमुनाह हेल्थ डेस्कले नौँ जनाको कोरोना जाँच गरेको छ । ‘एन्टिजेन किटमार्फत नौँ जनाको कोरोना जाँच गर्दा एक जना युवकमा कोरोना पुष्टि भएको छ,’ उनले भने ।
कोरोना जाँचका लागि जमुनाहा नाकामा ५० भाइल किट आएको उनले बताए । ‘पर्याप्त किट नभएकोले भारतबाट आउने सवैको जाँच गर्न सकिएको छैन,’ उनले भने ।
कोरोना पुष्टि भएका युवकमा कुनै लक्षण नदेखिएको बताउँदै उनले होम आइसोलेशनमा पठाइने बताए ।
Discussion about this post