बाँके असार २ गते ।
भारतबाट हुने प्रतिबन्धि लागु औषध आयातको क्रम रोकिएको छैन् । प्रहरीले चेकजाँचलाई कडाइ गरेपनि प्रतिबन्धित लागु औषध कारोवारी तथा प्रयोगकर्ताहरुले आयात गरिरहेका हुन् । प्रहरीलाई छलेर नेपाल भित्र्याउने गरेको भएपनि प्रहरीले पनि त्यस्ता कारोवारी र प्रयोगकर्तालाई पक्राउ गर्दै आएको छ ।
यसैक्रममा नेपालगञ्ज उपमहानगरपालिका–१ प्रगति टोल स्थितबाट एकजना ठूलो परिमाणमा लागू औषध ब्राउन सुगरसहित पक्राउ परेका छन । जिल्ला प्रहरी कार्यालय बाँके र लागू औषध नियन्त्रण ब्युरोको संयुक्त टोलीले ब्राउन सुगरसहित एकजनालाई पक्राउ गरेको हो ।
पक्राउ पर्नेमा नेपालगन्ज उपमहानगरपालिका वडा नं. १ प्रगतीटोल बस्ने २९ वर्षीय चुनचुन पासी रहेको बाँके प्रहरी प्रमुख एसपी रामप्रसाद घर्तीमगरले जानकारी दिए । उनका अनुसार उनीबाट १०६ ग्राम १८० मिलिग्राम लागू औषध ब्राउन सुगर बरामद भएको हो । पासीले सेतो प्लाष्टिकमा बेरि राखेको अवस्थामा उक्त लागु औषध बरामद भएको एसपी घर्तीमगरले बताए ।
पक्राउ परेका पासीलाई जिल्ला प्रहरी कार्यालयको हिरासतमा राखेर थप अनुसन्धान सुरु गरिएको पनि प्रहरीले जनाएको छ।
Discussion about this post