बाँके असार २० गते ।
पछिल्लो समय बाँकेका प्रहरी प्रमुख एसपी रामप्रसाद घर्तीमगर नेपालगन्जको विभिन्न भागमा पुगेर सुरक्षा ब्यवस्था बारे जानकारी लिने गरेका छन् । इस्लाम धर्मावलम्वीले दश दिनसम्म मनाउने मोहर्रम पर्वलाई लक्षित गरि उनी रातको समयमा नेपालगन्जका विभिन्न भागमा पुगेर सुरक्षा ब्यवस्थाको जानकारी लिने गरेका हुन् ।
इस्लाम धर्मावलम्वीले मोहर्रमको अवसरमा रातको समयमा इस्लाम धर्मका प्रवर्तक हजरत इमाम हुसैनको नाममा जुलुसहरू निस्कने गरेका छन् । ‘मोहर्रम पर्वलाई शान्तिपूर्ण बनाउन सुरक्षाकर्मी परिचालन भएका छन् । ति सुरक्षाकर्मीले सुरक्षा ब्यवस्था कसरी मिलाएका छन् ? र थप सशक्त बनाउन रातको समयमा आफै खटिएको छु,’ एसपी घर्तीमगरले भने ।
आइतबार दिउँसो अन्तिम जुलुसका साथ समापन हुने सो पर्वलाई शान्तिपूर्वक सम्पन्न गराउन नेपालगन्जमा ठूलो संख्यामा सुरक्षाकर्मी परिचालन गरिएको छ । उनले मोहर्मलाई लक्षित गरि नेपाल प्रहरी र सशस्त्र प्रहरी परिचालन भएको बताए । ‘रातको समयमा अवाञ्छित गतिविधि नहोस भन्ने उद्देश्यले करिव चार सय सुरक्षाकर्मी परिचालन गरिएको छ,’ उनले भने ।
जिल्ला प्रहरी कार्यालय, वडा प्रहरी कार्यालय, जिल्ला ट्राफिक प्रहरी कार्यालय र सशस्त्र प्रहरी बल नेपाल नं. ३० गण हेडक्वार्टर बागेश्वरी बाँकेबाट ठूलो संख्यामा सुरक्षाकर्मीहरू परिचालन गरिएको बाँकेका प्रहरी प्रमुख एसपी घर्तीमगरले अनलाईन खोजखबरलाई जानकारी दिए ।
एसपी घर्तीमगरसँगै सशस्त्र प्रहरी बल नेपाल नं. ३० गण हेडक्वार्टर बागेश्वरीका गणपति एसपी शोभाकान्त खनाल पनि रातको समयमा नेपालगन्जमा खटिने गरेका छन् । नेपालगन्जमा परिचालन भएका सशस्त्र प्रहरीहरुले सुरक्षा ब्यवस्था कसरी मिलाइरहेका छन् भन्ने जानकारी लिन रातको समयमा समेत नगरमा खटिदै आएको छु,’ उनले भने ।
मुस्लिम धर्मावलम्बीको महान पर्व मोहर्रमको आज आठौं दिन पनि ऐतिहासिक जुलुस निस्कने भएका छन् । नगरका विभिन्न स्थानबाट जुलुश निस्केर नगरको परिक्रमा गरिने भएको छ ।
अवाञ्छित गतिविधि हुन नदिन वडा प्रहरी कार्यालयका इन्चार्ज प्रहरी निरीक्षक अरुण बम पनि दिन–रात खटिदै आएका छन् । उनले भने, ‘मोहर्रमलाई ब्यवस्थित बनाउने हाम्रो दायित्व भएकोले दिनरात नभनी खटिएका छौँ,’ उनले भने ।
मोहर्रमलाई सभ्य र भब्य बनाउन सक्दो सहयोग गरिरहेको धम्बोजी मोहर्रम समितिका अध्यक्ष मेराज अहमद हल्वाई (हिमालय) ले जानकारी दिए । उनले भने, ‘आपसी भाइचार, प्रेम र सद्भावले नेपालगन्जलाई सद्भावको सहरको रुपमा चिनाउने गरेको छ । अन्य पर्व जस्तै मोहर्रमलाई पनि सभ्य, भब्य र ब्यवस्थित बनाउन हाम्रो पूर्ण साथ र सहयोग रहने छ ।’
मोहर्रमलाई ब्यवस्थित, मर्यादित र शान्त बनाउन बाँकेका प्रहरी प्रमुख एसपी घर्तीमगर र सशस्त्र प्रहरीका एसपी शोभाकान्त खनाल फिल्डमा खटिएको बताउँदै उनले उक्त कार्यको प्रशंसा गरे । ‘शुक्रबार राती भएको जुलुस कार्यक्रममा एसपी घर्तीमगर आफै खटिएर सुरक्षा ब्यवस्था मिलाउनु भयो । यो एकदमै सकारात्मक पक्ष हो,’ उनले भने ।
मोहर्रमलाई ब्यवस्थित बनाउने विषयमा बाँकेका विभिन्न धर्मका अगुवाहरुले प्रतिवद्धता जनाएका छन् । विभिन्न धर्मका अगुवाले मोहर्रम पर्वलाई सभ्य र भब्य बनाउन सहयोग गर्ने प्रतिवद्धता जनाएका हुन् ।
मोहर्रम पर्बका अवसरमा नेपालगञ्जमा ड्रोन क्यामेरा मार्फत निगरानी भइरहेको बाँकेका प्रहरी प्रवक्ता डिएसपी दिपक पातलीले जानकारी दिए । उनले नेपालगन्जमा भइरहेका हरेक गतिविधिको ड्रोन क्यामेरा मार्फत प्रहरीले निरीक्षण गरिरहेको बताए । ‘सम्वेदनशिल क्षेत्रको पहिचान गरि सुरक्षाकर्मी परिचालन गरिएको छ नै प्रहरीले ड्रोन क्यामेरा मार्फत निगरानी गरिरहेको छ,’ उनले भने, ‘कुनै गलत क्रियाकलाप भएको पाइए तत्काल नियन्त्रणमा लिएर कारवाहीको दायरामा ल्याउँछौँ ।’
इस्लामिक नयाँ वर्ष हिजरी संवत्को १ देखि १० तारिखसम्म मोहर्रम मनाउने गरिन्छ । ‘मोहर्रमका अवसरमा इस्लाम धर्मावलम्वीले ९ तारीखका दिन ताजिया स्थापना गरिन्छ । ‘स्थापना गरिएका ताजियाको समेत ड्रोन क्यामेराले निगरानी गरिने छ,’ उनले भने ।
Discussion about this post