स्रोत नखुलेको १२ लाख रुपैयाँसहित एक जना पक्राउ

रौतहट असार २६ गते ।
रौतहटमा प्रहरीले ठुलो परिमाणमा स्रोत नखुलेको रकमसहित एक जनालाई नियन्त्रणमा लिएको छ । बिहीबार बिहान भारतबाट गौरतर्फ आउँदै गरेको भारतीय नम्बरको मोटरसाइकललाई रोकेर चेकजाँच गर्दा प्रहरीले १२ लाख भन्दा बढी स्रोत नखुलेको रकमसहित एक जनालाई नियन्त्रणमा लिएको हो ।

प्रहरीको विशेष टोलीले गौर भन्सार नजिक चेकजाँच गर्ने क्रममा सर्लाही रामनगर गाउँपालिका–२ बस्ने चन्दन पण्डितलाई पक्राउ गरेको हो । ब्याग बोकेर गौरतर्फ आइरहेका पण्डितले शङ्कास्पद गतिविधि गरेपछि नियन्त्रणमा लिइएको मधेस प्रदेशका प्रहरी प्रमुख डीआइजी उमाप्रसाद चतुर्वेदीले जानकारी दिए ।

पण्डितको झोलाबाट स्रोत नखुलेको १२ लाख ७३ हजार ३ सय बरामद भएको डीआइजी चतुर्वेदीले बताए । उनका अनुसार उक्त झोलाबाट ९ लाख २८ हजार ५ सय रुपैयाँ नेपाली र २ लाख १५ हजार रुपैयाँ भारतीय फेला परेको छ ।

पैसाको स्रोत खुल्ने कागजात नदेखाएपछि उनलाई पक्राउ गरिएको उनको भनाई छ । साथै प्रहरीले पण्डितको साथबाट बीआर ०३ जे ९५४३ नम्बरको भारतीय मोटरसाइकलसमेत बरामद गरेको छ ।