बाँके साउन १५ गते ।
देशकै कान्छो बाँके राष्ट्रिय निकुञ्जले वन्यजन्तुका लागि पिउने पानीको ब्यवस्था गर्न निकुञ्जभित्र कृतिम ताल निर्माण गरेको छ । निकुञ्जभित्र रहेका सिमसार क्षेत्रलाई ब्यवस्थित गरिएको छ नै वन्यजन्तुले ओहोरदोहोर गर्ने ठाउँमा कृतिम ताल निर्माण गरेको छ । कृतिम तालमा सोलार पम्प मार्फत पानी संचय गर्ने ब्यवस्था मिलाइएको बाँके राष्ट्रिय निकुञ्जका रेन्जर सुपुष्प रेग्मीले बताए ।
चुरे र भावर क्षेत्रमा रहेको बाँके राष्ट्रिय निकञ्जका जनावरहरु पानी नपाउँदा तिर्खा मेटाउन राप्ती नदिमा आउँदा मानिससँग जम्का भेट हुँदा द्वन्द्व बढेपछि निकुञ्जले साना ठूला गरि झण्डै २५ वटा पोखरी निर्माण गरेको छ । निकुञ्ज भित्र पानी पोखरी निर्माण गरेपछि मानव र जंगली जनावर वीच द्वन्द्व कम भएको रेग्मीले बताए ।
बाँके राष्ट्रिय निकुञ्ज बाघ संरक्षणका लागि स्थापना गरिएको हो । बाघको लागि चित्तल, हरिण जस्ता वन्यजन्तु आवश्यक पर्ने भएकोले निकुञ्जले ति वन्यजन्तुको संरक्षण गर्न पानी, घाँसे मैदान ब्यवस्थापन गरिएको रेन्जर रेग्मीले बताए ।
पानीको खोजीमा राप्ती नदिमा आउने क्रममा मानव र जनावर वीच द्वन्द्व बढ्ने र महेन्द्र राजमार्गमा आउजाउ गर्ने सवारी साधनसँग ठोकिने खतरा पनि उत्तिकै थियो । तर, निकुञ्ज भित्र पानी पोखरी निर्माण गरिएपछि उक्त समस्या पनि न्यूनिकरण भएको रेग्मीले बताए ।
बाँके राष्ट्रिय निकुञ्जमा २५ वयस्क बाघ रहेका छन् । यस्तै ३४ प्रजातिका स्तनधारी वन्यजन्तु, २ सय ७६ प्रजातिका चरा, २४ प्रजातिका सरिसृप, ९ प्रजातिका उभयचर र ५५ प्रजातिका माछा ५५ गरी ४२२ प्रजाति रहेका छन् । विसं २०६७ असार २८ गते स्थापना भएको बाँके राष्ट्रिय निकुञ्ज नेपालगन्ज विमानस्थलबाट १६ किलोमिटरको दूरीमा रहेको छ ।
भिडियो पनि हेर्नुहोस्
Discussion about this post