बाँके साउन ३० गते ।
प्रहरीले चलाएको गोली लागेर बाँकेमा एक जना घाइते भएका छन् । लागु औषध कारोवार भइरहेको सूचनाको आधारमा नेपालगन्ज उपमहानगपालिका ४ बसपार्क पछाडि पुगेको प्रहरीमाथि आक्रमण गरेपछि प्रहरीले गोली चलाएर नियन्त्रणमा लिएको बाँके प्रहरी प्रवक्ता डिएसपी दीपक पातलीले जानकारी दिए ।
बिशेष सूचनाको आधारमा लागु औषध नियन्त्रण ब्युरो नेपालगजका प्रहरी सहायक निरीक्षक नबिनकुमार शाही र अस्थायी प्रहरी पोष्ट बसपार्कका प्रहरी नायव निरीक्षक बिष्णु शाहीको कमाण्डमा खटिएको संयुक्त प्रहरी टोलीले चलाएको गोली लागेर भारत बहराइच जिल्ला रुपइडियाका २० वषिय कार्तिक कुम्हार घाइते भएको उनले बताए । लागु औषध कारोबारमा संलग्न कुम्हारलाई नियन्त्रणमा लिन खोज्दा पक्राउ गर्न गएका प्रहरी टोली माथि नै आक्रमण गरि भाग्ने प्रयास गरेपछि नियन्त्रणमा लिन प्रहरीले गोली चलाएको हो,’ उनले भने ।
उनका अनुसार प्रहरी टोलीले टाइप ५४ चाइनिज पेस्तोलको एक राउण्ड गोली प्रहार गर्दा कुम्हारको दाँया खुट्टाको पिडुलामा गोली लागेको छ । उनको नेपालगन्जस्थित संजिबनी कलेज अफ मेडिकल साइन्सेजमा उपचार भइरहेको छ । उक्त घटनामा प्रहरी सहायक निरीक्षक शाहीको दाहिने पाखुरामा चोट लागेको छ । ‘घाइते कुम्हार र प्रहरी सहायक निरीक्षक शाहीको अवस्था सामान्य छ,’ उनले भने ।
कुम्हारको साथबाट लागु औषध ब्राउन सुगर जस्तो देखिने धुलो पदार्थ एक सय ११ ग्राम समेत बरामद भएको उनले जानकारी दिए ।
लागु औषध कारोवारमा संलग्नलाई पक्राउ गर्न बाँकेका प्रहरी प्रमुख एसपी रामप्रसद घर्तीमगरको नेतृत्वमा २५ जना प्रहरी परिचालन भएका थिए ।
बाँके प्रहरीले सोही ठाउँबाट दिउँसो थप ५० ग्राम २४० मिलिग्राम ब्राउनसुगर बरामद गरेको डिएसपी पातलीले जानकारी दिए । बाँके प्रहरीले बुधवार राती नेपालगन्ज उपमहानगरपालिका १४ उधौपुर्वाबाट २२ लाख तीन हजार ९१५ रुपैयाँ र १५ ग्राम ५ सय मिलिग्राम ब्राउनसुगर सहित सोही ठाउँका रमेश लोनियालाई पक्राउ गरेको थियो ।
Discussion about this post