बाँके कात्तिक १० गते ।
बाँकेका प्रमुख जिल्ला अधिकारी (प्रजिअ) फेरिएका छन्। कपिलबस्तुमा कार्यरत दिलकुमार तामाङलाई बाँके सरुवा गरिएको गृह मन्त्रालयले जनाएको छ।
यसअघि बाँकेका प्रमुख जिल्ला अधिकारी धर्मराज जोशीलाई सात महिनामै उदयपुर सरुवा गरिएको छ। सामान्यतया कार्यालय प्रमुखको एक वर्षको कार्यकाल हुन्छ । अबधि नपुग्दै सरुवा हुनुलाई कार्यसम्पादनमा असफल जस्तै मानिन्छ ।
गृह मन्त्रालयले आइतबार ३६ जना सहसचिवको सरुवा गरेको हो, जसअन्तर्गत बाँकेमा पनि प्रशासनिक नेतृत्व फेरबदल गरिएको हो। जोशीको बाँके कार्यकाल विवादास्पद रहँदै आएको थियो। स्थानीय सञ्चारकर्मी, अधिकारकर्मी र कानुन व्यवसायीसँगको व्यवहारका कारण उनी पटक–पटक चर्चामा आएका थिए। अपशब्द प्रयोग र दुव्र्यवहारका घटनाले उनको कार्यशैलीबारे प्रश्न उठेको थियो।
नागरिक तहबाट उनको रवैयाको विरोध बढेपछि विषय गृह मन्त्रालयसम्म पुगेको थियो। स्थानीय स्रोतका अनुसार, त्यसपछि उनले आफ्नो समर्थनमा हस्ताक्षर संकलन अभियानसमेत चलाएको आरोप लाग्दै आएको छ।
उनको कार्यशैलीले समाजमा ध्रुवीकरण ल्याएको भन्दै विभिन्न नागरिक समाज र संघ–संगठनहरूले समेत आलोचना गरेका थिए। अब बाँकेमा नयाँ प्रजिअका रूपमा आउन लागेका दिलकुमार तामाङले प्रशासनिक समन्वय र नागरिक–प्रशासन सम्बन्ध सन्तुलनमा ल्याउने अपेक्षा गरिएको छ।
Discussion about this post