बाँके मंसिर २ गते ।
बाँकेको सुरक्षामाथि पछिल्लो समय उठ्दै आएको चिन्ता, स्थानीय बासिन्दाको मनमा बस्दै गएको त्रास र गुण्डागर्दीको बढ्दो प्रभावबीच प्रहरीले भने फरार अपराधीविरुद्ध आक्रामक मोड लिएको छ । घटनाहरु सुनिए पनि पक्राउ दुर्लभ देखिन्थ्यो, तर केही दिनयता अवस्था बदलिन थालेको छ–एकपछि अर्को गर्दै ‘फरार’ सूचीमा रहेका अभियुक्तहरु प्रहरीको हातमा परिरहेका छन् ।
बाँकेका प्रहरी प्रमुख एसपी अंगुर जिसी कार्यालयमै व्यस्त देखिन्छन् । उनी पछिल्ला दिनमा समन्वय, निगरानी र कारबाहीका गतिविधिले गुम्सिएको कागजी फाइलहरु पल्टाउँदै छन् । उनी भन्छन् “गुण्डागर्दी गरि समाजमा आतंक फैलाउनेहरुको सूची बनाउने क्रममा पक्राउको गति बढाएका हौं ।” राप्तीसोनारी गाउँपालिका–२, मदुवाका ३० वर्षीय समिर भनिने सरोजविक्रम विष्ट लामो समयदेखि ‘फरार अभियुक्त’ को सूचीमा थिए । ठेक्का पट्टा विवाददेखि गुण्डागर्दी र ज्यान मार्ने उद्योगसम्मका मुद्दामा उनी संलग्न रहेको अदालतमा विचाराधीन थियो । प्रहरीका फाइलहरु पल्टिँदा बारम्बार उही नाम देखा पथ्र्यो—तर मानिस भने खुलेआम सहरमै हिंडिरहेको थियो ।
एसपी जिसी अनलाइन खोजखवरलाई भन्छन्– “फरार सूचीमा रहेका विष्ट छाती फुलाएर यताउता हिडेको खबर पाएपछि हामीले निगरानी कडा पार्यौं । अन्ततः उनलाई नेपालगन्जमै नियन्त्रणमा लिएर अदालतमा बुझाएका छौं ।” विष्टको मुद्दा पहिले नै अदालतमा विचाराधीन भएकाले प्रहरीमा म्याद थप्ने प्रक्रिया आवश्यक रहेन । अदालतमा बुझाइएपछि उनको आगामी कानुनी यात्रा न्यायालयकै जिम्मामा पुग्यो ।
विष्ट पक्राउ परेको दुई दिनमै अर्को खबर छायो–ज्यान मार्ने उद्योगमा मुद्दा दर्ता भएपछि लगातार फरार रहेका नेपालगन्ज उपमहानगरपालिका–१८, कारकाँदो बस्ने २८ वर्षीय विनय भण्डारी पनि पक्राउ परे । उनी नेपालगन्ज उपमहानगरपालिका–१, नजिकै लुकेर बसेको सूचनाको आधारमा प्रहरीले उनलाई पक्राउ गर्यो । एसपी जिसी भन्छन्– “गुण्डागर्दी गर्ने र समाजमा आतंक फैलाउने जो कोहीलाई कारवाहीको दायरामा ल्याइने छ । फरारहरु भाग्न थालेका छन्, तर हामी तर्सिँदैनौं ।” अपराधिक गतिविधि बढेको समाजमा प्रहरीले चलाएको यो अभियानले नयाँ संदेश दिएको छ । एसपी जिसी बारम्बार दोहोर्याउँछन्–“कानुन कार्यान्वयनमा हामी कुनै दवावमा पर्दैनौं—न राजनीतिक, न पदस्थ व्यक्तिको ।” उनको यो भनाइले प्रहरी संगठनभित्र नयाँ आत्मविश्वास पैदा गरेको देखिन्छ । अपराधीलाई छोड्ने ‘फोन कल’ को संस्कृति हटाउने संकेत पनि यसैमा भेटिन्छ ।
यी दुई गिरफ्तारीपछि अन्य फरार अभियुक्त र तस्करीमा संलग्न समूहहरुमा ‘भागाभाग’ देखिन थालेको प्रहरीको दाबी छ । निगरानी र सूचनाको जालो कडा भइरहेको छ । स्थानीय बासिन्दाले राति हिँडडुल गर्दा महसुस गर्ने डर केही हदसम्म कम भएको अनुभव सुनाउन थालेका छन् ।
एसपी जिसी थप्छन्–“अपराधीलाई संरक्षण दिने, समाजमा त्रास फैलाउने जो कोहीलाई पनि हामी निर्ममतापूर्वक कारवाही गर्छौं। उजुरी दिनुहोस् हामी तुरुन्तै कारवाही गर्छौं ।” बाँकेमा सुरु भएको यो ‘सफाइ अभियान’ प्रहरी प्रशासनको आक्रमकता मात्रै होइन; यो स्थानीय समाजले मागेको शान्ति, सुरक्षा र भरोसाको पुनःस्थापना पनि हो । फरार सूचीमा रहेका व्यक्तिहरु एकपछि अर्को पक्राउ परिरहेका छन् । एसपी जिसीले गुण्डागर्दी गर्ने विरुद्ध प्रहरीलाई जानकारी दिन पनि आव्हान गरेका छन् ।
Discussion about this post