बाँके मंसिर ५ गते ।
राष्ट्रिय जनमत पार्टीका अध्यक्ष रियाज अहमद शेषले देशमा ब्याप्त भ्रष्टाचार अन्त्यका लागि पार्टी दर्ता गरेको बताएका छन् । पार्टी दर्ता पछि डुडुवा गाउँपालिका ५ सुब्बापुर्वामा आयोजित स्वागत तथा सम्मान कार्यक्रममा उनले देशमा ब्याप्त भ्रष्टाचार निवारण गर्ने पार्टीको उद्देश्य भएको बताएका हुन् ।
उनले भ्रष्टाचारलाई अन्त्यका लागि चुनाव चिन्ह बुल डोजर लिएको बताउँदै उनले पार्टीमा मधेसी, मुस्लिम, दलित, थारु लगायत सवै जातजातिलाई समेट्ने उल्लेख गरे । ‘बुल डोजरले सवै चिज सोहोर्ने छ । राष्ट्रिय जनमत पार्टीले पनि भ्रष्टाचारलाई निर्मुल पार्ने भएकोले चुनाव चिन्ह बुल डोजर लिएका हौँ,’ उनले भने ।
उनले निर्वाचनले लोकतन्त्रलाई मजबुत बनाउने भएकोले फागुनमा घोषणा भएको निर्वाचनमा पार्टीले भाग लिने स्पष्ट पारे । तोकिएको समयमा निर्वाचन नभए देशलाई खतरा हुने दावी गर्दै उनले देशलाई निकास दिन निर्वाचन अपरिहार्य भएको बताए । ‘निर्वाचन नै लोकतन्त्रको बलियो पक्ष हो । तोकिएको समयमा निर्वाचन भएन भने देश जर्जर अवस्थामा पुग्ने छ । देशलाई निकास दिन हामी चुनावको पक्षमा छौँ,’ उनले भने ।
उनले एमाले, काँग्रेसले लोकतन्त्र मास्न खोजेको आरोप समेत लगाए । उनले तीन ठुला दलका कारण देशमा भ्रष्टाचार, अनियमितता, बेरोजगारी बढेको समेत बताए । उनले पार्टीलाई देशभर विस्तार गर्दै जाने जानकारी दिए । ‘मेचीदेखि महाकालीसम्म पार्टी विस्तार गरिने छ । पार्टी विस्तारका लागि सवै जिल्लाबाट माग भइरहेको छ । घोषणा भएको निर्वाचन अघि सवै जिल्लामा सम्भव नहोला, तर अर्को निर्वाचनसम्म सवै जिल्लामा पार्टी विस्तार हुने छ,’ उनले भने ।
कार्यक्रममा राष्ट्रिय जनमत पार्टीका नेता इर्फान अहमद शेषले तोकिएको समयमा निर्वाचन नभए जेन जीले गरेको भन्दा ठुलो विद्रोह हुने धारणा राखे । उनले केहि दल निर्वाचन विथोल्न लागेको बताउँदै त्यसका विरुद्ध राष्ट्रिय जनमत पार्टीले आन्दोलन गर्ने स्पष्ट पारे ।
उनले पार्टीले भ्रष्टाचार विरुद्ध पार्टीले अभियान थाल्ने स्पष्ट पारे । ‘भ्रष्टाचार विरुद्ध आवाज उठाउन पार्टी दर्ता भएको हो । भ्रष्टाचार निर्मुल पार्ने पार्टी स्थापनाको मुख्य उद्देश्य हो,’ उनले भने ।
उनले पार्टीमा युवालाई स्थान दिने बताउँदै जेन जीको मागलाई सम्बोधन गरिने जिकिर गरे । ‘जेन जीको विद्रोहको भावनालाई कदर गरि पार्टीमा स्थान दिइने छ,’ उनले भने, ‘पार्टीलाई बलियो र सुदृढ बनाउन देश ब्यापी अभियान थालिने छ ।’
पार्टी दर्ता भएपछि आयोजित पहिलो स्वागत तथा सम्मान कार्यक्रममा पार्टीका केन्द्रिय तहका विभिन्न नेता र कार्यकर्ताको सहभागिता रहेको थियो । ‘आफ्नो जन्मभूमीबाट स्वागत तथा सम्मान कार्यक्रम आयोजना गरि देश ब्यापी बनाउँछौँ,’ अध्यक्ष शेषले भने ।
Discussion about this post