बाँके मंसिर ११ गते ।
पश्चिम नेपालकै सबैभन्दा सुविधासम्पन्न सहर नेपालगन्जको नजिकै भएर पनि विगत ५० वर्षदेखि विद्युत माग गर्दै आएका डुडुवा गाउँपालिका–१ चौफेरी र सो वरिपरिका बासिन्दाको बिजुली बाल्ने सपना पूरा भएको छ ।
डुडुवा गाउँपालिका–१ चौफेरीसहित वरिपरिका पाँच बस्तीमा ५० वर्षपछि अहिले पहिलोपटक विद्युत् पुगेकाले स्थानीयमा चाडपर्व झै खुशी र उत्साह देखिएको हो ।
सदरमुकामबाट दस किलोमिटर टाढा नभए पनि दशकौँदेखि उज्यालो, शिक्षा, स्वास्थ्य र सडक सुविधा नपाएका बासिन्दाले बत्ती बल्ने क्षणलाई ऐतिहासिक परिवर्तनको रूपमा लिएको जनाएका छन् ।
डुडुवा १ चौफेरीका ७० वर्षीय तिर्थराम यादवले बत्ती बालिएको क्षणलाई जीवनभरको प्रतीक्षा पूरा भएको क्षण बताए । उनले टुकीको धुवाँ खाँदै काटेको जीवनमा बत्ती आउला भन्ने आशा मरिसके पनि अहिले आएर बिजुली बाल्न पाउँदा अतिनै खुशी लागेको बताए ।
यादवका अनुसार चौफेरी वर्षौदेखि उपेक्षित रहेको बस्ती हो, यसलाई प्रकृतिले मात्रै ठगेको होइन, नेताहरुले पनि सधैँ बेवास्ता गर्दै आएका हुन् ।
भारतको दशगजा, राप्ती नदी र डुडुवा खोलाबिच टापुजस्तो भौगोलिक क्षेत्र बनेको चौफेरी लगायतका बस्तीहरू लामो समयदेखि राज्यको पहुँचभन्दा टाढा रहेका थिए ।
लामो प्रतिक्षापछि बत्ती बलेसँगै गाउँघर झलमल बनेको र स्थानीयले ठुलो पर्वसरह खुशी मनाएको देखिएको छ । स्थानीय रमेश यादवका अनुसार बत्ती पुगेपछि रातमा सुरक्षा अनुभूति बढेको र आपत्कालीन अवस्थामा केही देखिने भएकाले सहजता भएको बताए ।
डुडुवा गाउँपालिकाका अध्यक्ष नरेन्द्र चौधरीले जनताको वर्षौदेखिको सपना पूरा भएकोमा आफुलाई पनि गर्व महसुस भएको बताए । उनले सो क्षेत्रका जनताका अन्य आवश्यकताहरु पनि छिटै पूरा हुने विश्वास दिलाए।
नेपाल विद्युत् प्राधिकरण नेपालगन्ज वितरण केन्द्रका प्रमुख जगन्नाथ लामिछानेले धेरै लामो प्रतिक्षा भएको ठाउँमा विद्युत् पुर्याउन पाउँदा खुशी लागेको बताए । सबैलाई उज्यालो दिन प्राधिकरण अहोरात्र खटिरहेको पनि उनले जनाए ।
सो क्षेत्रमा ५० वर्षपछि पुगेको विद्युत् स्थानीयका लागि केवल बत्ती मात्र होइन, आगामी विकासको सङ्केत भएको अधिकांशको भनाइ छ । उनिहरुको साझा भनाइ छ, “अँध्यारो हट्यो, अब विकास पनि आओस् ।”
Discussion about this post