बाँके मंसिर २६ गते ।
ट्राफिक नियम उलंघन गर्नेलाई कारवाहीको दायरामा ल्याउन जिल्ला ट्राफिक प्रहरी कार्यालय बाँकेले साप्ताहिक अभियान थालेको छ । साप्ताहिक अभियान अन्तरगत बाँके ट्राफिकले अतिरिक्त सीट बनाउने, मोटरसाइकलको बास्तविक आवाज मोडिफाई गरि ध्वनी प्रदुषण गर्नेलाई नियमन गर्नुका साथै ट्राफिक सचेतना फैलाउँदै आएको छ ।
ट्राफिक नियम विपरित सार्वजनिक सवारी साधनमा थप गरिएको अवैध सिट हटाउने अभियान अन्तरगत तीन सय वटा सार्वजनिक सवारी साधनबाट चार सय ६७ वटा अतिरिक्त (अवैध) सिट तथा ‘ग्याप सिट’ हटाइएको जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुर शाहीले जानकारी दिए । ‘अतिरिक्त सिट तथा ग्याप सिट राखेका सार्वजनिक सवारी साधनका चालक र सवारी धनीलाई एक पटकका लागि सम्झाइ–बुझाइ पठाएका छौँ,’ उनले भने, ‘फेरि राखेको पाइएमा कानुन बमोजिम कारवाही गरिने छ ।’
ट्राफिक नियम उलङ्घन गर्ने सवारी साधनलाई कारवाहीको दायरामा ल्याउन विशेष अभियान थालेको ट्राफिक प्रहरीले दुई महिनाको अवधिमा आफुखुसी नम्बर प्लेट परिवर्तन गरि संचालन गरेका ७१ वटा इभी गाडीलाई कारवाही गरेको छ । ‘ट्राफिक नियम उलंघन गर्ने १७ वटा इभी गाडीलाई कारवाहीको लागि यातायात ब्यबस्था कार्यालय नेपालगंजमा पठाएको छौँ । कारवाहीबाट एक लाख सहत्तरी हजार रुपियाँ राजश्व संकलन भएको छ,’ उनले भने ।
ध्वनी प्रदुषण गर्ने र सर्वसाधरणमा आतंक सिर्जना गर्ने ४१ वटा मोटरसाइकललाई कारवाही गरिएको शाहीले बताए । ‘मोटरसाइकलको वास्तविक आवाजलाई मोडिफाइ गरि चर्को आवाज बनाएको पाइएपछि कारवाही गरिएको छ,’ शाहीले भने ।
उनले ५२ वटा यात्रु बाहक सवारी साधनलाई भाडादर टास्न लगाएको जानकारी दिए । ’नम्बर प्लेट नभएका र स्पष्ट नदेखिने एक सय २६ वटा सवारी साधनलाई नम्बर प्लेट लेख्न लगाएका छौ,’ उनले भने, ’आफुखुसी मानिस झुन्ड्याउनको लागि बनाईएका फलामको डण्डी र सिटको स्वरुप तथा सिट थप गरि संचालन गरिएका ४ सय ६७ वटा सवारी साधनहरुलाई कारवाही स्वरुप मुडा तथा ग्याप सिट निकाल्न लगाइएको छ ।’
ओभर लोड बोक्ने १३ वटा सवारी साधनलाई पनि ट्राफिक प्रहरीले कारवाही गरेको छ ।
’एक हजार एक सय ३२ वटा साइकल तथा अन्य यान्त्रिक सवारी साधनहरुमा रातको समयमा टल्कने रिफ्लेक्टिभ स्टिकर टाँस गरिएको छ,’ उनले भने, ’सवारी दुर्घटना न्युनीकरण गर्न बाँके ट्राफिक प्रहरी सशक्त रुपमा उत्रिएको छ । ट्राफिक नियम उलंघन गर्ने कोहि पनि उन्मुक्ति पाउने छैन ।’
Discussion about this post