बाँके मंसिर २९ गते ।
नेपालगन्ज उपमहानगरपालिका र जिल्ला प्रहरी कार्यालय बाँकेको सहकार्यमा जिल्ल ट्राफिक प्रहरी कार्यालय बाँकेले एक सय ७ वटा ई–रिक्सा नियन्त्रणमा लिएको छ । कागजपत्र नभएका, नविकरण नगरेका र नेपालगन्ज उपमहानगरमा सूचिकृत नभएका ई–रिक्सालाई नियमन गर्न अभियान थालिएको बाँकेका प्रहरी प्रमुख एसपी अंगुर जिसीले बताए ।
उनले अवैध रुपमा संचालन भएका र उमेर नपुगेकाले ई–रिक्सा चलाउँदा दुर्घटना बढेको बताए । ‘कागजपत्र नभएका ई–रिक्सा दुर्घटना हुँदा वीमा नपाइने र चालक जेल जानुपर्ने अवस्था छ । अवैध रुपमा संचालन भएका ई–रिक्साका कारण नगरको सौन्दर्य समेत विगारेको छ,’ उनले भने ।
बाँकेका प्रमुख जिल्ला अधिकारी दिलकुमार तामाङले ई–रिक्सालाई कानुनको दायरामा ल्याउन र दुर्घटना न्यूनिकरण गर्न अभियान थालेको बताए । उनले नेपालगन्जमा संचालन भइरहेका धेरै ई–रिक्सा अवैध भएको बताए । ‘हाम्रो उद्देश्य दुख दिने होइन । हामीले नियमन गरि करको दायरामा ल्याउने प्रयास मात्र गरेका हौँ,’ उनले भने ।
नेपालगन्जका मेयर प्रशान्त विष्टले नेपालगन्ज उपमहानगरमा सूचिकृत भएका ई–रिक्सालाई मात्र संचालन हुने दिने बताए । ‘नेपालगन्जमा चलाउने, तर कर अन्यत्रै तिर्ने कुरा राम्रो होइन । करको दायरामा ल्याउने र दुर्घटना न्यूनिकरण गर्न यो अभियान थालेका हौँ,’ उनले भने ।
जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुर शाहीले अवैध रुपमा संचालन भइरहेका ई–रिक्साले नेपालगन्जको सौन्दर्यकरणमा बाधक बनेको बताए । उनले कागजपत्र नभएका ई–रिक्सा नियन्त्रणमा लिएर करको दायरामा ल्याउने स्पष्ट पारे । ‘अवैध रुपमा संचालन हुने ई–रिक्सालाई कानुनको दायरामा ल्याउने र नेपालगन्जको ट्राफिक ब्यवस्थालाई चुस्त दुरुस्त बनाउने योजना छ,’ उनले भने, ‘यो अभियान जारी रहने छ । अवैध रुपमा संचालन हुने ई–रिक्सालाई नियन्त्रणमा लिएर कारवाही गरिने छ । ’
अवैध ई–रिक्सा नियन्त्रण गर्न बाँकेका प्रमुख जिल्ला अधिकारी तामाङ, प्रहरी प्रमुख एसपी जिसी, नेपालगन्जका मेयर विष्ट, प्रमुख प्रशासकीय अधिकृत रामहरी शर्मा, जिल्ला ट्राफिक प्रमुख प्रहरी निरीक्षक शाही गणेशमान चोक पुगेका थिए ।
Discussion about this post