बाँके माघ ६ गते ।
स्थानीय तहको नेतृत्वबाट संघीय संसदतर्फको यात्रामा कमरुद्दिन राई अगाडि बढेका छन्। नेपालगन्ज उपमहानगरपालिकाका नगर उपप्रमुख पदबाट राजीनामा दिएर उनले बाँके निर्वाचन क्षेत्र नं.२ बाट प्रतिनिधिसभा निर्वाचनका लागि जनता समाजवादी पार्टी नेपाल (जसपा)बाट मनोनयन दर्ता गराएका छन्।
स्थानीय शासनमा लामो समय सक्रिय रहँदै आएका राईले अब केन्द्रिय राजनीतिको मैदान रोज्नुको मुख्य कारण नागरिकका आवाजलाई प्रत्यक्ष रूपमा प्रतिनिधिसभासम्म पु¥याउनु रहेको बताए। “स्थानीय तहमा रहेर जनताको समस्या नजिकबाट बुझ्ने अवसर पाएँ उनले भने, “अब ती समस्या राष्ट्रिय नीतिनिर्माणको तहसम्म पु¥याउने जिम्मेवारी लिन चाहन्छु।”
राईले आफू कुनै पदको लोभमा नभई सेवाको भावना लिएर राजनीतिमा आएको स्पष्ट पारे। उनले भने, “मैले पदका लागि उम्मेदवारी दिएको होइन, जनताको आवाज बन्न उम्मेदवारी दिएको हुँ।” राईले छाता चुनाव चिन्हबाट निर्वाचनमा होमिएको जानकारी दिँदै बाँके–२ का नागरिकले भोग्दै आएका शिक्षा, स्वास्थ्य, रोजगारी, सीमा क्षेत्रका समस्या तथा समावेशी विकासका मुद्दालाई संसदमा जोडदार रूपमा उठाउने प्रतिबद्धता जनाए। उनले जेनजी आन्दोलनको म्यान्डेट अनुसार काम गर्ने प्रतिबद्धता जनाए ।
स्थानीय तहमा रहँदा विकास निर्माण, सामाजिक समन्वय र नागरिक सहभागितामा सक्रिय भूमिका खेलेका राईलाई धेरैले व्यवहारिक र जनमुखी नेताका रूपमा चिन्ने गरेका छन्। जनता समाजवादी पार्टी नेपालले मधेस, पहिचान, समावेशिता र सामाजिक न्यायलाई मुख्य एजेन्डा बनाउँदै आएको सन्दर्भमा कमरुद्दिन राईको उम्मेदवारीले बाँके–२ को चुनावी प्रतिस्पर्धालाई थप चासोपूर्ण बनाएको छ।
Discussion about this post