बाँके माघ २४ गते ।
बाँके प्रहरीले नेपाल–भारत सीमा क्षेत्र जमुनाह नाकाबाट ४८ ग्राम खैरो हेरोइनसहित दुई जनालाई पक्राउ गरेको छ।
जिल्ला प्रहरी कार्यालय बाँकेका प्रवक्ता डिएसपी दीपक पातलीका अनुसार पक्राउ पर्नेमा दाङको गढवा गाउँपालिका–४ का ३० वर्षीय हिमाल केसी र घोराही उपमहानगरपालिका–३ का २७ वर्षीय सरद खड्का रहेका छन्।
डिएसपी पातलीका अनुसार आज बिहान साढे १० बजे नेपालगन्ज उपमहानगरपालिका–१५ स्थित जमुनाह चेकपोस्टमा सवारी तथा व्यक्ति चेकजाँचको क्रममा गोप्य सूचनाका आधारमा उनीहरूलाई नियन्त्रणमा लिइएको हो। भारतको रुपैडियाबाट खैरो हेरोइन तस्करी गरी बाँके र दाङका विभिन्न स्थानमा बिक्री वितरण गर्ने उद्देश्यले नेपाल प्रवेश गर्दै गरेको अवस्थामा उनीहरू पक्राउ परेका हुन्।
इलाका प्रहरी कार्यालय जमुनाह र लागुऔषध नियन्त्रण ब्यूरोको संयुक्त टोलीले खानतलासी गर्दा हिमाल केसीले आफ्नो पेन्टीभित्र लुकाएर राखेको अवस्थामा खैरो हेरोइन बरामद भएको डिएसपी पातलीले जानकारी दिए।
प्रहरीले उनीहरूको साथबाट दुई थान मोबाइल फोन समेत बरामद गरेको छ।
पक्राउ परेका दुवै जनामाथि लागुऔषध (नियन्त्रण) ऐनअनुसार मुद्दा दर्ता गरी जिल्ला प्रहरी कार्यालय बाँकेमा राखेर थप अनुसन्धान अगाडि बढाइएको डिएसपी पातलीले बताए।
Discussion about this post