काठमाडौं माघ २५ गते ।
सरकारले आसन्न प्रतिनिधिसभा सदस्य निर्वाचनमा ड्रोनको प्रयोगमा प्रतिबन्ध लगाएको छ। गृह मन्त्रालयका प्रवक्ता एवं सहसचिव आनन्द काफ्लेले आगामी फागुनमा हुने निर्वाचनलाई लक्षित गर्दै केन्द्रीय सुरक्षा समितिले ड्रोन प्रयोगमा रोक लगाउने निर्णय गरिसकेको जानकारी दिए।
प्रवक्ता काफ्लेले सामाजिक सञ्जालको दुरुपयोग बढ्दै गएकाले त्यसलाई नियन्त्रण गर्न नेपाल प्रहरीले सञ्चालनमा ल्याएको अत्याधुनिक युनिटलाई थप प्रभावकारी बनाइने बताए। निर्वाचन आचारसंहिताविपरीत मिथ्या तथा भ्रमपूर्ण सूचना फैलाउने र घृणास्पद अभिव्यक्ति दिने गतिविधिमाथि निगरानी गर्न विशेष टोली सक्रिय रहेको उनको भनाइ छ।
निर्वाचन विरोधी गतिविधिमा संलग्नलाई कानुनी दायरामा ल्याउन सुरक्षा संयन्त्रले चुस्त निगरानी गरिरहेको उल्लेख गर्दै उनले निर्वाचन प्रहरीको बीमाको व्यवस्था, सञ्चार सम्पर्क नहुने मतदानस्थलको पहिचान तथा आवश्यक प्रबन्ध मिलाउने तयारी भइरहेको जानकारी दिए।
गृह मन्त्रालयले सबै सुरक्षा निकाय तथा प्रशासनिक संयन्त्रलाई निर्वाचन सुरक्षामा कुनै कमजोरी हुन नदिन र व्यवस्थापनलाई चुस्त राख्न निर्देशन दिइसकेको पनि उनले बताए।
यसैगरी, गृहमन्त्री ओमप्रकाश अर्यालले एकीकृत निर्वाचन सुरक्षा योजना–२०८२ अनुसार जिम्मेवार निकायबाट भइरहेका कार्य, जनशक्ति परिचालन तथा बन्दोबस्ती योजनाको समीक्षा गर्दै आवश्यक सुधार र प्रभावकारी कार्यान्वयनका लागि निर्देशन दिएको प्रवक्ता काफ्लेले जानकारी दिए।
गृह मन्त्रालयले सामाजिक सञ्जाल प्रयोगमा संयम अपनाउन आग्रह गर्दै मिथ्या, भ्रमपूर्ण तथा कसैलाई लाञ्छना लगाउने सामग्री प्रकाशन नगर्न चेतावनी दिएको छ। यस्ता गतिविधिमा संलग्न भए कानुनी कारबाही गरिने मन्त्रालयले स्पष्ट पारेको छ।
Discussion about this post