बाँके माघ २६ गते ।
बाँकेका तीन स्थानीय तहमा पाठेघरको मुखको क्यान्सरविरुद्ध एचपिभी खोप अभियान सुरु गरिएको छ। जिल्ला स्वास्थ्य कार्यालय बाँकेका अनुसार नेपालगन्ज उपमहानगरपालिका, खजुरा गाउँपालिका र बैजनाथ गाउँपालिकामा खोप लगाउन थालिएको हो।
जिल्ला स्वास्थ्य कार्यालयका वरिष्ठ जनस्वास्थ्य अधिकृत गोकर्ण गिरीका अनुसार हालसम्म नेपालगन्जमा १३२ जना, बैजनाथमा १४१ जना र खजुरा गाउँपालिकामा १८४ जनालाई एचपिभी खोप लगाइएको छ।
जिल्लाभर विद्यालय जाने ६ हजार ५३१ जना र विद्यालय नजाने २ हजार ५३ जना गरी कुल ८ हजार ५८४ जनालाई खोप लगाउने लक्ष्य निर्धारण गरिएको छ। लक्षित संख्याअनुसार राप्तीसोनारी गाउँपालिकामा ७२० जना, कोहलपुर नगरपालिकामा १ हजार ७०६ जना, बैजनाथ गाउँपालिकामा ८८० जना, खजुरा गाउँपालिकामा १ हजार १९ जना, जानकी गाउँपालिकामा ६७२ जना, नेपालगन्ज उपमहानगरपालिकामा २ हजार ४२४ जना, डुडुवा गाउँपालिकामा ४४१ जना र नरैनापुर गाउँपालिकामा ७२१ जनालाई खोप लगाइने छ।
स्वास्थ्य कार्यालयका अनुसार कोहलपुर नगरपालिका, डुडुवा गाउँपालिका, नरैनापुर गाउँपालिका र राप्तीसोनारी गाउँपालिकामा आजदेखि खोप अभियान सुरु गरिएको छ भने जानकी गाउँपालिकामा यही माघ २७ गतेदेखि खोप लगाइने छ।
खोपको लक्षित समूहमा कक्षा ६ मा अध्ययनरत छात्रा, विद्यालय नजाने १० वर्ष उमेरका किशोरी, साथै गत वर्ष सञ्चालन गरिएको एचपिभी खोप अभियानमा छुटेका हाल कक्षा ७ देखि १० सम्म अध्ययनरत छात्रा तथा ११ देखि १४ वर्ष उमेर समूहका किशोरी रहेका छन्।
स्वास्थ्य कार्यालयका अनुसार नेपालमा औसत रूपमा प्रत्येक दिन पाठेघरको मुखको क्यान्सरका कारण चार जना महिलाको मृत्यु हुने गरेको छ। गत वर्ष बाँके जिल्लामा ३३ हजार ७५९ जनालाई एचपिभी खोप लगाइएको थियो। यस वर्षको खोप अभियान माघ २५ गतेदेखि फागुन ४ गतेसम्म सञ्चालन हुने जनाइएको छ।
Discussion about this post