बाँके माघ २५ गते ।
जिल्ला प्रशासन कार्यालय बाँकेको सूचनालाई अनुशरण गर्दै बाँके जिल्लामा हालसम्म ७५ थान इजाजत प्राप्त हातहतियार (बन्दुक) सर्वसाधारणले प्रहरीलाई बुझाएका छन्।
जिल्ला प्रहरी कार्यालय बाँकेका प्रहरी प्रवक्ता तथा प्रहरी नायब उपरीक्षक दीपक पातलीका अनुसार जिल्ला प्रहरी कार्यालय मातहतका इलाका प्रहरी कार्यालय, प्रहरी चौकीलगायतका विभिन्न स्थानमा ७५ थान हातहतियार बुझाइएको हो।
आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै सुरक्षालाई ध्यानमा राखी जिल्ला प्रशासन कार्यालय बाँकेले इजाजत प्राप्त हातहतियार प्रहरी कार्यालयमा बुझाउन सार्वजनिक सूचनामार्फत आग्रह गरेको थियो।
प्रहरी प्रवक्ता पातलीका अनुसार प्रहरीलाई बुझाइएका हातहतियारमा भरुवा बन्दुक, बारबोरलगायतका हतियार रहेका छन्।
जिल्ला प्रशासन कार्यालय बाँकेका अनुसार जिल्लामा सर्वसाधारणसँग इजाजत प्राप्त ५५५ वटा हातहतियार रहेका छन्। हालसम्म तीमध्ये ७५ वटा मात्र प्रहरीलाई बुझाइएको पाइएको छ। ५५५ जनाले हतियार राख्नका लागि लाइसेन्स लिएको र कतिपय व्यक्तिसँग दुईदेखि तीन वटासम्म हतियार तथा लाइसेन्स रहेको जनाइएको छ।
हातहतियार खरखजाना ऐन, २०१९ अनुसार सुरक्षा चुनौतीको आधारमा इजाजत लिएर सर्वसाधारणले हतियार राख्न पाउने व्यवस्था रहेको छ। सोही कानुनी प्रावधानअनुसार सर्वसाधारणले हतियार राखेका हुन्। हालसम्म अपेक्षाकृत कम मात्रामा हतियार बुझाइएको भन्दै जिल्ला प्रहरी कार्यालय बाँकेले पुनः हतियार बुझाउन आग्रह गरिने र त्यसपछि पनि नबुझाउनेको खोजी प्रक्रिया अघि बढाइने जनाएको छ।
नेपाल–भारत सीमासँग जोडिएको बाँके जिल्लामा निर्वाचन सुरक्षाका चुनौती सधैं रहने भएकाले नाका बन्ददेखि विशेष सुरक्षा गस्ती तथा विशेष चुनावी सुरक्षा योजना बनाएर अगाडि बढ्ने जिल्ला सुरक्षा समितिले जनाएको छ।
जिल्ला सुरक्षा समितिका संयोजक तथा प्रमुख जिल्ला अधिकारी दिलकुमार तामाङले निर्वाचनलाई शान्तिपूर्ण, सुरक्षित र निष्पक्ष रूपमा सम्पन्न गर्न सुरक्षाका सबै आवश्यक उपाय अपनाइने बताएका छन्।
Discussion about this post