बाँके फागुन ६ गते ।
बाँके जिल्लामा निर्वाचन आचारसंहिता प्रभावकारी रूपमा कार्यान्वयन गराउन अनुगमन कार्य सुरु गरिएको छ।
जिल्लाका सहायक प्रमुख जिल्ला अधिकारी तथा आचारसंहिता अनुगमन समितिका अधिकृत पूर्णबहादुर खत्रीका अनुसार आचारसंहिता विपरीत हुने गतिविधि नियन्त्रण गर्ने उद्देश्यले अनुगमन थालिएको हो। उनका अनुसार आज बाँके निर्वाचन क्षेत्र नं. ३ मा अनुगमन गरिएको छ।
अनुगमनका क्रममा गाउँ–बस्ती क्षेत्रमा सञ्चालनमा रहेका अटो–रिक्सा र ई–रिक्सामा विभिन्न राजनीतिक दलका झण्डा तथा फ्लेक्स टाँसिएको भेटिएको थियो। निर्वाचन आचारसंहिताअनुसार सवारी साधनमा उम्मेदवारको फोटो अंकित झण्डा, ब्यानर वा फ्लेक्स राख्न नपाइने व्यवस्था रहेकाले त्यस्ता सामग्री हटाउने कार्य सुरु गरिएको खत्रीले जानकारी दिए।
प्रहरीसँगको समन्वयमा आचारसंहिता उल्लंघन गर्ने सामग्री हटाउने तथा आवश्यक परे थप कारबाही अघि बढाइने जनाइएको छ। निर्वाचनलाई स्वच्छ, निष्पक्ष र शान्तिपूर्ण रूपमा सम्पन्न गराउन अनुगमनलाई निरन्तरता दिइने प्रशासनले जनाएको छ।
Discussion about this post