नवलपरासी, चैत २ गते।
‘जेनजी’ प्रदर्शनका क्रममा उत्पन्न तनावग्रस्त परिस्थितिपछि नवलपरासी कारागारबाट भागेका कैदीमध्ये १८० जना अझै फरार रहेका छन्।
गत भदौ २३ र २४ गते भएको ‘जेनजी’ प्रदर्शनपछि भदौ २५ गते नवलपरासी कारागारबाट ५४६ जना कैदी भागेका थिए। तीमध्ये ३६२ जना पुनः नवलपरासी कारागारमा फर्किएका छन् भने चार जना अन्य कारागारमा राखिएको कारागार प्रशासन नवलपरासीका नायब सुब्बा किरण आर्यालले जानकारी दिए।
उनका अनुसार केही कैदीबन्दी स्वेच्छाले कारागार फर्किएका थिए भने केहीलाई प्रहरीले पक्राउ गरी कारागार पठाएको थियो। हालसम्म १५० पुरुष र ३० महिला गरी १८० जना कैदीबन्दी अझै फरार रहेका छन्।
कारागार प्रशासनले कारागार नियन्त्रणमा लिएर भागेका कैदीबन्दीलाई समयमै पुनः कारागारमा फर्किन आग्रह गर्दै सूचना जारी गरेको थियो।
कैदीहरू भाग्नुअघि नवलपरासी कारागारमा ५७५ जना कैदीबन्दी रहेका थिए। तीमध्ये ४१ जना विदेशी (भारतीय) नागरिक थिए। भारतीय कैदीबन्दीमध्ये तीन जनालाई प्रहरीले पक्राउ गरी कारागार बुझाएको भए पनि ३८ जना अझै फरार रहेको जिल्ला प्रहरी कार्यालय नवलपरासीका प्रहरी नायब उपरीक्षक तथा सूचना अधिकारी वीरदत्त पन्तले बताए।
फरार कैदीबन्दीको खोजतलास जारी रहेको प्रहरीले जनाएको छ।
Discussion about this post