सुर्खेत चैत २ गते।
बर्दिया राष्ट्रिय निकुञ्ज क्षेत्रमा सिकार खेल्न गएका सुर्खेतका पाँच जना व्यक्ति बेपत्ता भएका छन्।
बेपत्ता हुनेमा बराहताल गाउँपालिका–१ ज्यामिरेका २५ वर्षीय रेशम समसेली, ४१ वर्षीय रविलाल दमाई, ३४ वर्षीय रामबहादुर घर्ती, ३० वर्षीय सुनिल समसेली तथा लेकवेशी नगरपालिका–८ गङ्गटे घर भई हाल बर्दियामा बस्दै आएका ४५ वर्षीय दुर्गाबहादुर सिजाली रहेका छन्।
जिल्ला प्रहरी कार्यालय सुर्खेतका प्रहरी नायब उपरीक्षक मोहनजङ्ग बुढथापाका अनुसार आइतबार बेलुका करिब ५ बजेतिर सिकार खेल्न गएका व्यक्तिहरू सम्पर्कविहीन भएको सूचना प्रहरीलाई प्राप्त भएको हो।
हाल प्रहरी सहायक निरीक्षक टोपेन्द्र सिंह ठकुरीको कमाण्डमा चार जनाको प्रहरी टोली खोजी कार्यमा खटिएको छ। साथै घटनाबारे जिल्ला प्रहरी कार्यालय बर्दियालाई समेत जानकारी गराइएको जिल्ला प्रहरी कार्यालय सुर्खेतले जनाएको छ।
Discussion about this post