बाँके चैत १२ गते ।
बाँके जिल्लाका विभिन्न नदी तथा खोलामा नदीजन्य पदार्थको अवैध उत्खनन र ओसारपसार कार्य निरन्तर भइरहेको पाइएको छ । प्रहरीले पटक–पटक अवैध गतिविधिमा संलग्न सवारीसाधन नियन्त्रणमा लिए पनि यस्तो कार्य पूर्ण रूपमा रोकिएको छैन ।
जिल्ला प्रहरी कार्यालय बाँकेका अनुसार विभिन्न स्थानमा गरिएको अनुगमनका क्रममा नदीजन्य बालुवा, गिट्टीलगायत सामग्री अवैध रूपमा उत्खनन तथा ढुवानी गर्ने सवारीसाधन नियन्त्रणमा लिइएका छन् । प्रहरी नायब उपरीक्षक दीपक पातलीका अनुसार जिल्लाका विभिन्न क्षेत्रबाट आठ वटा सवारीसाधन नियन्त्रणमा लिइएको हो ।
कोहलपुर नगरपालिकाका विभिन्न स्थानबाट एक जेसिबी, दुई टिप्पर र एक ट्याक्टर गरी चार वटा सवारीसाधन नियन्त्रणमा लिइएको प्रहरीले जनाएको छ । ती सवारीसाधनलाई आवश्यक कारबाहीका लागि कोहलपुर नगरपालिकाको कार्यालयमा बुझाइएको छ ।
यस्तै, बैजनाथ गाउँपालिका–२ स्थित मकैबारी क्षेत्रबाट एक जेसिबी, दुई टिप्पर र एक ट्याक्टर गरी थप चार वटा सवारीसाधन नियन्त्रणमा लिइएको छ । ती सवारीसाधनलाई आवश्यक कारबाहीका लागि बैजनाथ गाउँपालिकाको गाउँ कार्यपालिकाको कार्यालयमा बुझाइएको जिल्ला प्रहरी कार्यालयले जनाएको छ ।
प्रहरीले नदीजन्य स्रोतको अवैध दोहन नियन्त्रण गर्न नियमित अनुगमन तथा कारबाहीलाई तीव्र बनाइएको जानकारी दिएको छ । साथै विभिन्न नदी तथा खोलामा निगरानी थप सुदृढ गरिएको बताइएको छ ।
Discussion about this post