काठमाडौं चैत १३ गते ।
राष्ट्रिय स्वतन्त्र पार्टी (रास्वपा)का वरिष्ठ नेता बालेन शाहले आज प्रधानमन्त्री पदको शपथ लिने भएका छन्। राष्ट्रपति कार्यालय शीतल निवासमा दिउँसो १२ बजेर ३४ मिनेटमा शपथ ग्रहण कार्यक्रम तय गरिएको छ।
रास्वपाका महामन्त्री कवीन्द्र बुर्लाकोटीका अनुसार समारोहमा १०८ जना बटुकद्वारा स्वस्ति शान्ति वाचन, १६ जना बौद्ध भिक्षुद्वारा अष्टमंगल पाठ तथा सात वटा शंखबाट शंखनाद गरिने कार्यक्रम छ।
संविधानको धारा ७६ को उपधारा (१) अनुसार नेता शाहलाई प्रधानमन्त्रीमा नियुक्त गरिनेछ। शपथ कार्यक्रममा विभिन्न राजनीतिक दलका प्रतिनिधि, कूटनीतिक नियोग, नागरिक समाज तथा उच्च सरकारी अधिकारीलाई आमन्त्रण गरिएको छ। प्रधानमन्त्रीसँगै मन्त्रीहरूको पनि शपथ गराइने तयारी रहेको छ।
यद्यपि बिहान ८ः३० बजेसम्म मन्त्रिपरिषद्का सदस्यबारे जानकारी सार्वजनिक नभएको राष्ट्रपति कार्यालयले जनाएको छ।
गत फागुन २१ मा सम्पन्न प्रतिनिधिसभा निर्वाचनमा रास्वपाले १८२ सिट जितेको थियो। शाह झापा क्षेत्र नं. ५ बाट ६८ हजार ३४८ मतसहित निर्वाचित भएका थिए।
Discussion about this post