बाँके चैत २० गते ।
सेवाग्राहीलाई झन्झटमा पार्दै विभिन्न बहानामा अतिरिक्त रकम असुल्ने प्रवृत्तिविरुद्ध प्रहरीले कडाइ सुरु गरेको छ। यस क्रममा नेपालगन्जस्थित यातायात व्यवस्था कार्यालय परिसरबाट ९ जनालाई पक्राउ गरिएको छ।
लाइसेन्स, सवारी दर्ता तथा नवीकरणलगायत सेवामा “छिटो काम गरिदिन्छु” भन्दै अवैध रूपमा रकम असुल्ने तथा सेवाग्राहीलाई अनावश्यक झन्झटमा पार्ने गतिविधि बढेपछि प्रहरीले विशेष निगरानी बढाएको थियो।
वडा प्रहरी कार्यालय तथा जिल्ला प्रहरी कार्यालय बाँकेबाट खटिएको संयुक्त टोलीले ५ महिला र ४ पुरुषलाई नियन्त्रणमा लिएको हो।
जिल्ला प्रहरी कार्यालय बाँकेका प्रहरी नायव उपरीक्षक (डीएसपी) दीपक पातलीका अनुसार सेवाग्राहीबाट विभिन्न बहानामा रकम असुल गर्ने तथा काममा झन्झट सिर्जना गर्ने गतिविधिमा संलग्न भएको पाइएपछि उनीहरूलाई पक्राउ गरिएको हो।
उनले पक्राउ परेका सबै व्यक्ति बिचौलिया नै हुन् भन्ने निष्कर्षमा नपुगिएको स्पष्ट पार्दै कसुरको प्रकृति र मात्राका आधारमा अनुसन्धान भइरहेको जानकारी दिए।
हाल पक्राउ परेका ९ जनालाई जिल्ला प्रहरी कार्यालय बाँकेमा राखेर थप अनुसन्धान भइरहेको प्रहरीले जनाएको छ।
Discussion about this post