बाँके चैत २४ गते।
बाँके जिल्लामा नदीजन्य पदार्थको अवैध उत्खनन रोक्न जिल्ला समन्वय समितिले विभिन्न स्थानमा स्थलगत अनुगमन गरेको छ। राप्तीसोनारी गाउँपालिकाअन्तर्गत राप्ती नदीका विभिन्न खोलामा भइरहेको अवैध उत्खननबारे टोलीले निरीक्षण गरेको हो।
जिल्ला समन्वय समितिका प्रमुख ज्ञानेन्द्रकुमार चौधरीको नेतृत्वमा गएको टोलीले गुलरी–ढलैया, जलालाघाट र टिकुलीपुर घाटको अनुगमन गरेको थियो।
अनुगमनका क्रममा मापदण्डविपरीत नदीको बहाव परिवर्तन गरी ग्राभेल तथा बालुवा उत्खनन गरिएको, खोलामा अत्यधिक हेभी उपकरण प्रयोग गरिएको तथा निर्धारित सीमा भन्दा बढी गहिराइमा खनिएको जस्ता गतिविधि भेटिएको प्रमुख चौधरीले जानकारी दिए।
उनका अनुसार अधिकांश खोलामा हाल मापदण्डविपरीत अवैध उत्खनन भइरहेको छ, जसलाई नियन्त्रण गर्न आवश्यक पहल थालिएको छ।
प्रमुख चौधरीले अवैध उत्खनन नियन्त्रणमा स्थानीय तहको महत्वपूर्ण भूमिका रहने भए पनि गाउँपालिकाले अपेक्षित चासो नदिँदा समस्या बढेको बताए। उनले अवैध गतिविधि रोक्न स्थानीय तह र प्रहरी प्रशासनको ध्यानाकर्षण गराइएको जानकारी दिए।
स्थानीय बासिन्दाका अनुसार राप्ती नदी तथा अन्य खोलाबाट अवैध रूपमा नदीजन्य पदार्थ निकाल्ने क्रम बढ्दो छ। साथै, घाट र क्रसर उद्योगहरूको प्रभावकारी नियमन गर्नुपर्ने माग समेत उठेको छ।
समन्वय प्रमुख चौधरीका अनुसार उत्खननको ठेक्का लिएका कम्पनीहरूले समेत मापदण्ड उल्लंघन गर्दै मनोमानी रूपमा उत्खनन गरेको पाइएको छ। अनुगमन टोलीमा समन्वय समितिका पदाधिकारी तथा कर्मचारीहरूको सहभागिता रहेको थियो।
Discussion about this post