काठमाडौं चैत २५ गते ।
पश्चिमी न्यूनचापीय प्रणाली र स्थानीय वायुको प्रभावका कारण देशका विभिन्न भूभागमा मौसम बदली भई पश्चिम नेपालबाट वर्षा सुरु भएको छ।
जल तथा मौसम विज्ञान विभागका अनुसार हाल गण्डकी, लुम्बिनी, कर्णाली र सुदूरपश्चिम प्रदेशमा पूर्णतया बदली रहेको छ भने बाँकी भूभागमा आंशिकदेखि सामान्य बदली रहेको छ।
विभागले दिएको जानकारीअनुसार बागमती, लुम्बिनी, कर्णाली र सुदूरपश्चिम प्रदेशका केही स्थानमा मेघगर्जन तथा चट्याङसहित हल्का वर्षा भइरहेको छ।
विभागका मौसमविद् रोजन लामिछानेका अनुसार वर्षाको सक्रियता दिउँसो अझ बढ्नेछ भने केही स्थानमा भारी वर्षा तथा हिमपातसमेत हुन सक्ने सम्भावना छ।
बिहान १०ः०० बजेसम्मको विवरणअनुसार पछिल्लो तीन घण्टामा चितवनदेखि पश्चिमतर्फ ६० भन्दा बढी केन्द्रमा वर्षा भएको छ। विभागका अनुसार अछाममा ८.६, सुर्खेतमा ७.६, डडेलधुरामा ५.२, रोल्पामा ८.२, प्युठानमा ५.२ र चितवनमा ४.२ मिलिमिटर वर्षा मापन गरिएको छ।
यसैगरी कालीकोट, डोटी, रुकुम, रोल्पा, म्याग्दी, बाग्लुङ, दाङ र अर्घाखाँची लगायतका जिल्लामा पनि हल्का वर्षा भएको छ। वर्षा प्रणाली पूर्वतर्फ सर्दै गएको जनाइएको छ।
दिउँसो गण्डकी, लुम्बिनी, कर्णाली र सुदूरपश्चिम प्रदेशमा पूर्ण बदली रहने तथा अन्य भूभागमा आंशिकदेखि सामान्य बदली रहने विभागले जनाएको छ।
दिउँसो गण्डकी, लुम्बिनी, कर्णाली र सुदूरपश्चिम प्रदेशका धेरै स्थानमा तथा कोशी र बागमती प्रदेशका पहाडी तथा हिमाली भूभागका केही स्थानमा, साथै मधेस प्रदेशसहित तराई क्षेत्रका थोरै स्थानमा मेघगर्जन, चट्याङ, हुरीबतास र असिनासहित मध्यम वर्षा तथा हिमपातको सम्भावना रहेको छ।
यसैगरी, ती प्रदेशका पहाडी तथा हिमाली क्षेत्रका एक–दुई स्थानमा भारी वर्षा र हिमपातको सम्भावना रहेको विभागले जनाएको छ।
Discussion about this post