बाँके चैत २८ गते ।
नेपालगन्जका विभिन्न स्थानमा यात्रु (प्यासेन्जर) तान्ने कार्यमा संलग्न व्यक्तिहरूमाथि प्रहरीले कारबाही तीव्र पारेको छ। जिल्ला प्रहरी कार्यालय बाँकेको सक्रिय पहलमा बसपार्क, पुष्पलालचोक र धम्बोजी क्षेत्रबाट २३ जनालाई नियन्त्रणमा लिइएको हो।
बाँके प्रहरी प्रवक्ता डीएसपी दिपक पातलीका अनुसार नियन्त्रणमा लिइएका व्यक्तिहरूमाथि गरिएको स्क्रिनिङपछि १७ जनालाई थप अनुसन्धानका लागि नियन्त्रणमै राखिएको छ भने अन्यलाई आवश्यक प्रक्रिया पूरा गरी छाडिएको छ।
उनका अनुसार सार्वजनिक स्थानमा यात्रु तान्ने गतिविधिले यात्रुहरूलाई असहज बनाउने, झगडा–विवाद निम्त्याउने तथा यातायात व्यवस्थापनमा अव्यवस्था सिर्जना गर्ने भएकाले यस्तो अभियान सञ्चालन गरिएको हो।
जिल्ला प्रहरी कार्यालय बाँकेले शान्ति सुरक्षा कायम गर्न तथा सर्वसाधारणलाई सहज र सुरक्षित यात्रा सुनिश्चित गर्न यस्ता अभियानलाई निरन्तरता दिने जनाएको छ। प्रहरीले गरेको यस सक्रिय कदमले बजार क्षेत्रमा अनुशासन कायम गर्न र अव्यवस्थित गतिविधि नियन्त्रण गर्न सकारात्मक प्रभाव परेको स्थानीयवासीहरूले बताएका छन्।
Discussion about this post