बाँके वैशाख १८ गते ।
बाँकेको डुडुवा गाउँपालिका–१ स्थित कृषि चौफेरी गाउँमा हालै भएको भीषण आगलागीबाट घरबारविहीन बनेका ६ परिवारलाई राहत सामग्री वितरण गरिएको छ।
आगलागीका कारण हग्गु यादव, कृपाराम यादव, कुँवारे यादव, लल्लु यादव, सञ्जय यादव र अरुण यादवका घर पूर्ण रूपमा जलेर नष्ट भएका थिए।
डुडुवा गाउँपालिकाले प्रभावित परिवारलाई नगद तथा खाद्यान्नसहित राहत उपलब्ध गराएको जनाएको छ। प्रत्येक परिवारलाई ५ हजार रुपैयाँ नगदका साथै एक बोरा चामल, ५ किलो दाल, ५ लिटर खाने तेल, ५ किलो आलु, त्रिपाल, चिउरा, चाउचाउ, बिस्कुट, गुड, मिठाई तथा एक पेटी पानी वितरण गरिएको हो।
गाउँपालिका अध्यक्ष नरेन्द्रकुमार चौधरी प्रभावित क्षेत्रमा स्वयं पुगेर राहत हस्तान्तरण गरेका थिए। उनले आगलागीबाट ठूलो क्षति भएको उल्लेख गर्दै तत्कालका लागि उक्त सहयोगले केही राहत पुग्ने विश्वास व्यक्त गरे।
राप्ती नदीको कटान र डुबानको उच्च जोखिममा रहेको उक्त क्षेत्रमा गर्मी याममा आगलागीका घटना दोहोरिने गरेका छन्। स्थानीयवासीले दीर्घकालीन जोखिम न्यूनीकरणका लागि प्रभावकारी योजना आवश्यक रहेको बताएका छन्।
तत्काल राहत उपलब्ध भए पनि पीडित परिवारको पुनःस्थापना र सुरक्षित आवासको चुनौती भने अझै कायमै रहेको छ।
Discussion about this post