बाँके वैशाख २१ गते ।
भारतबाट लागुऔषध बेच्ने उद्देश्यले बाँकेको नेपालगञ्ज आएका दुई भारतीय नागरिक ठूलो परिमाणको ब्राउनसुगरसहित पक्राउ परेका छन् ।
लागुऔषध नियन्त्रण ब्यूरो शाखा कार्यालय नेपालगञ्ज र जिल्ला प्रहरी कार्यालय बाँकेको संयुक्त टोलीले भारतको बहराइच जिल्ला, रुपैडिहा थानास्थित बाबागञ्जका ३२ वर्षीय मोहम्मद हामिद र सोही स्थानकी २२ वर्षीया सविना देवी पथरकटलाई ६८ ग्राम ८१० मिलिग्राम ब्राउनसुगरसहित पक्राउ गरेको हो ।
प्रहरीका अनुसार विशेष सूचनाको आधारमा खटिएको टोलीले आज बिहान करिब साढे १० बजे नेपालगञ्ज उपमहानगरपालिका–५, फुल्टेक्रा जाने बाटोमा उनीहरूलाई शंकास्पद अवस्थामा फेला पारी नियन्त्रणमा लिएको थियो । त्यसपछि गरिएको शरीर तलासीका क्रममा मोहम्मद हामिदले लगाएको कालो पाइन्टको दाहिने खल्तीबाट ब्राउनसुगर बरामद गरिएको जनाएको छ ।
उनीहरूका साथबाट उक्त परिमाणको ब्राउनसुगरसहित दुई थान मोबाइल फोन र भारतीय नम्बर प्लेट (युपी ४० बीएच ४७०८) को मोटरसाइकल समेत बरामद गरिएको प्रहरीले जनाएको छ ।
पक्राउ परेका दुवै जनालाई आवश्यक अनुसन्धान तथा कानुनी कारबाहीका लागि जिल्ला प्रहरी कार्यालय बाँकेको हिरासतमा राखिएको छ । प्रारम्भिक अनुसन्धानका आधारमा उनीहरू भारतस्थित लागुऔषध कारोबारमा संलग्न गिरोहसँग सम्बन्धित रहेको आशंका गरिएको प्रहरीले जनाएको छ ।
Discussion about this post