बाँके वैशाख २२ गते ।
राष्ट्रिय स्वतन्त्र पार्टी (रास्वपा) कोहलपुर नगर समितिले वास्तविक सुकुम्बासीको पहिचान गरी उनीहरूको वैकल्पिक व्यवस्था सुनिश्चित गरेपछि मात्र अतिक्रमित सार्वजनिक जग्गा खाली गर्न कोहलपुर नगरपालिकासँग आग्रह गरेको छ ।
सोमबार रास्वपा कोहलपुर नगर समिति सचिव देविन सुवेदीसहितको टोलीले नगर प्रमुख पूर्णप्रसाद आचार्यलाई भेटी सार्वजनिक तथा सरकारी जग्गा खाली गर्ने प्रक्रियाअघि प्रभावित नागरिकहरूको उचित व्यवस्थापन गर्न ध्यानाकर्षण गराएको हो ।
सुवेदीद्वारा हस्ताक्षरित मागपत्रमा नगरपालिकाले वैशाख १६ गते जारी गरेको अतिक्रमित जग्गा खाली गर्ने १० दिने अत्यन्त जरुरी सूचनाप्रति गम्भीर चासो व्यक्त गरिएको छ । मागपत्रमा सार्वजनिक तथा सरकारी सम्पत्तिको संरक्षण राज्यको कानुनी दायित्व भएको उल्लेख गर्दै दीर्घकालदेखि बसोबास गर्दै आएका नागरिकलाई वैकल्पिक व्यवस्था नगरी हटाउने कदमले मानवीय संवेदना तथा संविधानप्रदत्त आवास अधिकारमाथि प्रश्न उठाएको जनाइएको छ ।
मागपत्रअनुसार सङ्घीय मामिला तथा सामान्य प्रशासन मन्त्रालयको वैशाख १७ गतेको निर्णय र परिपत्रले ‘वास्तविक सुकुम्बासीको पहिचान’ तथा ‘उनीहरूका लागि सुरक्षित आवाससहित वैकल्पिक व्यवस्थापन योजना तयार गर्ने’ निर्देश गरेको उल्लेख गरिएको छ । साथै गृह मन्त्रालयले पनि समन्वय र पहिचानका आधारमा मात्र प्रक्रिया अघि बढाउन निर्देशन दिएको जनाइएको छ ।
रास्वपाले बस्ती हटाउनुअघि वास्तविक सुकुम्बासीको पहिचान गर्न, उनीहरूको गाँस, बास र कपासको सुनिश्चितता गर्दै सुरक्षित आवासको व्यवस्था गरी स्थानान्तरणपछि मात्र जग्गा खाली गर्ने प्रक्रिया अघि बढाउन तथा मानवीय पक्षलाई ध्यानमा राख्दै समयसीमा थप गर्न माग गरेको छ ।
“हाम्रो पार्टी कानुनी राज्यको पक्षधर हो, तर विकास र संरक्षणका नाममा नागरिकलाई घरबारविहीन बनाउनु राज्यको दायित्व होइन,” मागपत्रमा उल्लेख गरिएको छ ।
यसैबीच, कोहलपुर नगरपालिकाले वैशाख १६ गते सूचना जारी गर्दै नगरभित्रका अतिक्रमित सार्वजनिक तथा सरकारी जग्गा खाली गर्न १० दिने समयसीमा तोकेको थियो । सूचनाअनुसार वैशाख २५ गते साँझ ७ बजेसम्म संरचना हटाउन भनिएको छ भने त्यसपछि नगरपालिकाले वैशाख २६ गते बिहान ६ बजेदेखि कानुनी प्रक्रिया अनुसार हटाउने चेतावनी दिएको छ ।
Discussion about this post