बाँके वैशाख २३ गते ।
बाँके जिल्लाका राप्तीसोनारी, डुडुवा र नरैनापुर गाउँपालिकाका स्थानीय बासिन्दा राप्ती नदी वारपार गर्न अझै डुङ्गामै निर्भर रहन बाध्य छन् । वर्षौँदेखि पुल निर्माण नहुँदा उनीहरूले दैनिक रूपमा जोखिमपूर्ण यात्रा गर्नुपरेको छ ।
यी क्षेत्रका धेरै किसानको खेती नदीपारि डुडुवातर्फ रहेकाले दैनिक कामका लागि नदी तर्नुपर्ने बाध्यता छ । नेपालगन्ज आवतजावतका लागि डुङ्गा नै छिटो र सहज माध्यम मानिए पनि जोखिमका बाबजुद आवतजावत जारी रहेको स्थानीय बताउँछन् ।
डुडुवा गाउँपालिका–१ कुडुवाका ६५ वर्षीय अमिरका लोहारका अनुसार पिप्रहवा घाटमा पुल निर्माणको माग दशकौँदेखि उठ्दै आए पनि अहिलेसम्म पूरा हुन सकेको छैन । वर्षात् सुरु भएसँगै जोखिम अझ बढ्ने र बाढीका कारण डुङ्गा दुर्घटनाका घटना समेत हुने गरेको उनले बताए ।
स्थानीयका अनुसार विगतमा डुङ्गा दुर्घटनामा ज्यान गुमाउने घटना पनि भएका छन् । डुडुवा–१ चौफेरीका पहलवान यादवले विशेषगरी बर्खायाममा नदी तर्नु अत्यन्त जोखिमपूर्ण हुने भन्दै सुरक्षित विकल्प नहुँदा दैनिक ज्यान जोखिममा राख्नुपरेको गुनासो गरे ।
डुङ्गा चालक विपत चौहानका अनुसार सञ्चालनमा रहेका डुङ्गा पुराना भइसकेकाले जोखिम झन् बढ्दै गएको छ । नयाँ डुङ्गा व्यवस्था गरिए केही हदसम्म सहजता आउने उनको भनाइ छ ।
हाल राप्ती नदीमा पिप्रहवा, सतीघाट र कुडुवा गरी तीन मुख्य घाटबाट डुङ्गा सञ्चालन हुँदै आएको छ । डुङ्गा चालकहरूका अनुसार बाढीका बेला यात्रा अझ खतरनाक हुने गर्दछ ।
यसैबीच, स्वास्थ्य सेवा प्रवाहमा पनि समस्या देखिएको छ । डुडुवा–१ होलिया स्वास्थ्य चौकीकी अनमी सिमा घर्तिमगर खानले खोप कार्यक्रम सञ्चालनका लागि समेत जोखिमपूर्ण रूपमा नदी पार गर्नुपर्ने अवस्था रहेको बताइन् ।
स्थानीयले पुल निर्माण भए आवतजावत, स्वास्थ्य सेवा र दैनिक जीवन सहज हुने विश्वास व्यक्त गरेका छन् । तर, वर्षौँदेखि उठ्दै आएको पुल निर्माणको माग अझै पूरा हुन सकेको छैन ।
Discussion about this post